Бізнес-навіны

Прадпрыемствы "Беллеспаперапрама" ў 2021 годзе наблізіліся да $1 млрд экспарту

Фота з архiва

14 студзеня, Мінск /Кар. БЕЛТА/. Прадпрыемствы "Беллеспаперапрама" ў 2021 годзе наблізіліся да $1 млрд экспарту. Аб гэтым паведаміў сёння журналістам старшыня канцэрна Міхаіл Касько, перадае карэспандэнт БЕЛТА.

"Прадпрыемствы канцэрна ў мінулым годзе спрацавалі ўпэўнена. Тая планка, якую мы абяцалі дасягнуць падчас даклада ў Добрушы кіраўніку дзяржавы, дасягнута і нават крыху перавышана. Мы наблізіліся да $1 млрд экспарту. Акрамя таго, мы вярнулі інвестыцыйных крэдытаў прадпрыемстваў дрэваапрацоўкі і цэлюлозна-папяровай прамысловасці на суму больш за Br500 млн. Усе абавязацельствы перад бюджэтам, банкамі, працоўнымі калектывамі выкананы. Заработная плата вырасла і на большасці прадпрыемстваў, асабліва мадэрнізаваных, перасягнула Br1,5 тыс.", - сказаў Міхаіл Касько.

Паводле яго слоў, у бягучым годзе драйверамі росту будуць Добрушская папяровая фабрыка "Герой працы", Завод газетнай паперы ў Шклове і Светлагорскі ЦКК. "Гэта той рэзерв, які на фоне стабільнай работы астатніх прадпрыемстваў павінен паслужыць стымулам, каб мы не толькі ўтрымалі планку, але і крыху прыраслі. Ёсць усе перадумовы для дасягнення паказчыкаў, закладзеных у бізнес-планы прадпрыемстваў, нягледзячы на складанасці, звязаныя з пандэміяй", - адзначыў старшыня канцэрна.

На гэту пяцігодку запланаваны шэраг інвестыцыйных праектаў. У іх ліку праект па будаўніцтве папяровай машыны для мяшочнай паперы з цэлюлозы на Светлагорскім ЦКК. "Яшчэ адзін праект запланаваны ў Івацэвічах. Разлічваем пашырыць вытворчасць драўняна-стружкавых пліт. Бачым устойлівы попыт на гэты від плітных матэрыялаў. Гэта паслужыць дадатковым штуршком, каб развівалася мэблевая прамысловасць у краіне", - дадаў Міхаіл Касько.

Акрамя таго, у гэтым годзе будзе запушчаны пелетны завод у Віцебску. "Мы яшчэ больш паглыбім перапрацоўку нізкасортнай сыравіны", - падкрэсліў старшыня канцэрна.

версія для друку

зрабіць стартавай

дабавіць у выбранае