Бізнес-навіны

Пляцоўку БУТБ плануюць выкарыстоўваць для паставак дагестанскіх тавараў у Беларусь

19 сакавіка, Мінск /Кар. БЕЛТА/. У час анлайн-перагавораў прадстаўнікоў Беларускай універсальнай таварнай біржы (БУТБ) з кіраўніцтвам Цэнтра падтрымкі экспарту (ЦПЭ) Дагестана (РФ) вызначаны перспектыўныя напрамкі развіцця біржавога гандлю, у тым ліку выкарыстанне пляцоўкі біржы для нарошчвання паставак дагестанскіх тавараў у Беларусь, паведамілі БЕЛТА ў прэс-службе БУТБ.

"Мы прааналізавалі рынак Беларусі з улікам экспартнага патэнцыялу Дагестана і выдзелілі чатыры групы тавараў, якія, на нашу думку, мэтазгодна пастаўляць у вашу краіну, у тым ліку праз біржавую пляцоўку, - абазначыў намеры дырэктар ЦПЭ Дагестана Руслан Абаскуліеў. - У адносна невялікіх аб'ёмах гэта прадукцыя ўжо імпартуецца у Беларусь, і попыт на яе, безумоўна, ёсць. З дапамогай біржы мы хацелі б знайсці новых гандлёвых партнёраў і павялічыць продажы".

Размова ідзе аб выкарыстанні біржавых таргоў для маштабавання паставак на беларускі рынак такой прадукцыі, як рыс, шэрсць, кармавыя дабаўкі і абсталяванне для малакаперапрацоўчай прамысловасці. Паводле слоў Руслана Абаскуліева, ЦПЭ гатовы аказаць садзейнічанне ў акрэдытацыі на БУТБ дагестанскіх вытворцаў гэтай прадукцыі - у першую чаргу суб'ектаў малога і сярэдняга прадпрымальніцтва.

З гэтай мэтай плануецца арганізаваць візіт у Дагестан беларускай бізнес-дэлегацыі і ў якасці аднаго з пунктаў дзелавой праграмы прадугледзець правядзенне біржавога семінара, што дасць магчымасць дагестанскім прадпрымальнікам дэталёва азнаёміцца з магчымасцямі БУТБ, атрымаць адказы на хвалюючыя іх пытанні і пачаць выкарыстоўваць біржавыя інструменты ў рабоце.

Паводле даных таварнай біржы, на гэты момант праз біржавыя таргі ў Дагестан рэалізуецца пераважна сметанковае масла. За мінулы год агульная сума здзелак склала $1,6 млн, а за першыя два месяцы гэтага года - $0,7 млн. Акрамя таго, у бягучым годзе заключаны першыя біржавыя кантракты на імпарт воўны з Дагестана. Пакупніком выступіла буйное беларускае тэкстыльнае прадпрыемства.

версія для друку

зрабіць стартавай

дабавіць у выбранае