28 жніўня, Мінск /Кар. БЕЛТА/. Першы энергаблок Беларускай АЭС плануюць увесці ў эксплуатацыю ў снежні 2019 года, паведаміў галоўны інжынер РУП "Беларуская АЭС" Анатоль Бондар у эфіры праграмы "Контуры" на тэлеканале АНТ, паведамляе БЕЛТА.
Раней паведамлялася, што першы энергаблок плануецца ўвесці ў эксплуатацыю ў 2019 годзе, другі - у 2020-м.
"Тэрмін - снежань 2019 года, увод першага энергаблока. Павінна быць поўная гатоўнасць, я думаю, наша задача - дабіцца гэтай поўнай гатоўнасці ў тэрмін, да чаго і будзем імкнуцца", - сказаў Анатоль Бондар.
На гэты час на першым энергаблоку зманціраваны корпус рэактара і ўсе чатыры парагенератары. Завяршылася зварка галоўнага цыркуляцыйнага трубаправода - гэта ключавая падзея для падрыхтоўкі да запуску першага блока.
Беларуская АЭС будуецца па тыпавым расійскім праекце АЭС-2006 новага пакалення "3+" паблізу Астраўца (Гродзенская вобласць).-0-