Бізнес-навіны

Пастаўкі тэхнікі, кааперацыя ў прамысловасці і АПК. Як плануюць развіваць супрацоўніцтва Беларусь і Растоўская вобласць

17 лістапада, Мінск /Кар. БЕЛТА/. Беларусь зацікаўлена ў пастаўках тэхнікі, кааперацыі ў прамысловасці і АПК з Растоўскай вобласцю Расіі. Аб гэтым заявіў намеснік прэм'ер-міністра Беларусі Юрый Шулейка на сустрэчы з губернатарам Растоўскай вобласці Юрыем Слюсарам, перадае карэспандэнт БЕЛТА.

Як адзначыў Юрый Шулейка, супрацоўніцтва з Растоўскай вобласцю актыўна развіваецца. Беларусь разлічвае на далейшае ўмацаванне ўзаемавыгадных адносін, на рэалізацыю доўгатэрміновых праграм узаемадзеяння. У ліку прыярытэтных сфер - машынабудаванне, абмен вопытам у сельскай гаспадарцы і інш.

"Гатовы працаваць у кааперацыі па любых узаемавыгадных пазіцыях", - сказаў Юрый Шулейка.

Віцэ-прэм'ер павіншаваў Юрыя Слюсара з выбраннем кіраўніком вобласці і падкрэсліў, што па многіх напрамках ужо дасягнуты добрыя вынікі.

"У нас дадатная дынаміка тавараабароту. Думаю, што яна будзе прагрэсіраваць у бліжэйшы час. Вашаму рэгіёну патрэбна пасажырская тэхніка, і мы гатовы максімальна працаваць (у гэтым напрамку. - Заўвага БЕЛТА). У час вашага візіту прадэманструем і магчымасці па вытворчасці грузавой, сельскагаспадарчай, спецыяльнай тэхнікі", - расказаў Юрый Шулейка.

Паводле яго слоў, беларускія аўтобусы прадстаўлены ўжо на маршрутах у Растоўскай вобласці, і спецыялісты могуць даць ацэнку, накіраваць пажаданні па камплектацыі транспарту з улікам спецыфікі кліматычных умоў. Са свайго боку Беларусь можа падзяліцца практыкай укаранення тралейбусаў з аўтаномным ходам, электробусаў пры абслугоўванні новых мікрараёнаў. Знакавай падзеяй стане адкрыццё ў канцы лістапада гандлёва-сэрвіснага цэнтра МАЗа ў Растове-на-Доне, які стане мультыбрэндавым.

Таксама вытворцы гатовы прапанаваць шырокую лінейку машын для АПК. У рэспубліцы 80 працэнтаў прымяняемай тэхнікі - айчыннай вытворчасці. Яшчэ адзін перспектыўны напрамак - пастаўкі камунальнай тэхнікі. Акрамя таго, Беларусь прапануе супрацоўніцтва ў станкабудаванні, металаапрацоўцы. У сельскай гаспадарцы магчымы сумесныя праекты ў жывёлагадоўлі, раслінаводстве, у вытворчасці тэхналагічнага абсталявання, селекцыйнай рабоце.

Значны патэнцыял Юрый Шулейка бачыць ва ўзаемадзеянні ў сферы замены ліфтавага абсталявання, водападрыхтоўкі.

Юрый Слюсар у сваю чаргу падзякаваў за магчымасць наведаць Беларусь і запрасіў беларускую дэлегацыю з візітам у адказ. Ён звярнуў увагу, што ў рэгіёна з Беларуссю склаліся цёплыя адносіны. Удалося дасягнуць высокага ўзроўню гуманітарнага, эканамічнага супрацоўніцтва. Юрый Слюсар сказаў, што рэгіён плануе абнавіць парк пасажырскай тэхнікі - закупіць каля тысячы аўтобусаў.

"Адкрыццё цэнтра МАЗа дае нам гарантыю спраўнасці тэхнікі. Мы разумеем, што на працягу жыццёвага цыкла тэхнікі будуць спецыялісты, запчасткі, рэгламент, абслугоўванне. Гэта адзін з фактараў на карысць беларускіх аўтобусаў. Другі плюс - прывабная лізінгавая стаўка", - сказаў кіраўнік расійскага рэгіёна.

Ён адзначыў высокую якасць беларускіх тавараў. Дэлегацыя Растоўскай вобласці плануе вывучыць перспектывы супрацоўніцтва ў пастаўках электробусаў і іншай тэхнікі.

версія для друку

зрабіць стартавай

дабавіць у выбранае