Бізнес-навіны

Пасол у Кітаі: попыт на беларускую прадукцыю вялізны, але ёсць нюансы продажаў на электронных пляцоўках

Фота з архiва

23 ліпеня, Мінск /Кар. БЕЛТА/. Попыт на беларускую прадукцыю вялізны, але ёсць нюансы продажаў на электронных пляцоўках. Аб гэтым у інтэрв'ю старшыні праўлення Беларускага саюза журналістаў Андрэю Крывашэеву заявіў пасол Беларусі ў Кітаі Аляксандр Чарвякоў, паведамляе БЕЛТА.

"Уваходзіць у Кітай трэба з адпаведным таварам - стандарты, сертыфікацыя і гэтак далей. І тут вялікую дапамогу прадпрыемствам аказваюць дзяржорганы, пасольства. Для таго, каб правесці адпаведныя дазвольныя працэдуры. Кітай - вельмі складаны рынак, з высокай канкурэнцыяй, і тут трэба выходзіць з таварамі сусветнай якасці, - сказаў пасол. - Хачу адзначыць, што ў нас шмат такіх тавараў, асабліва прадукцыя харчовай прамысловасці. Кітайцы любяць нашу прадукцыю".

Разам з тым Аляксандр Чарвякоў звярнуў увагу на шэраг момантаў, якія часам перашкаджаюць яшчэ больш актыўнаму пашырэнню айчыннай прадукцыі на кітайскім рынку. "Мы недзе не поўнасцю адпрацоўваем пытанне ўпакоўкі, не да канца можам прадставіць тавар так, як прадстаўляюць буйныя карпарацыі. Вось тут нам трэба больш актыўна адпрацоўваць", - прывёў ён адзін з прыкладаў.

Таксама ёсць праблема продажаў на электронных пляцоўках у Кітаі. У першую чаргу яна звязана з тым, што вытворцы не заўсёды могуць у поўным аб'ёме задаволіць патрэбнасць у тым ці іншым тавары, як гэтага патрабуе рынак. "Мы пачалі прадаваць ужо, але не хапае аб'ёму. А для таго, каб аб'ём быў, нам неабходна адпаведная інфраструктура продажаў і падтрымкі экспарту на тэрыторыі Кітая. Таму што кітайскі спажывец хоча (атрымаць тавар. - Заўвага БЕЛТА) сёння і цяпер. Чакаць, што тавар прыйдзе праз месяц, - гэта не пра Кітай. Нашы вытворчасці павінны паспяваць. Таму што сапраўды на беларускую прадукцыю попыт вялікі", - расказаў Аляксандр Чарвякоў.

версія для друку

зрабіць стартавай

дабавіць у выбранае