Бізнес-навіны

Новы рэзідэнт "Вялікага каменя" зоймецца вытворчасцю тэст-сістэм і рэагентаў для малекулярнай біялогіі

Фота "Вялікага каменя"

13 ліпеня, Мінск /Кар. БЕЛТА/. Новы рэзідэнт "Вялікага каменя" зоймецца вытворчасцю тэст-сістэм і рэагентаў для малекулярнай біялогіі, паведамілі карэспандэнту БЕЛТА ў прэс-службе індустрыяльнага парка.

У кітайска-беларускім індустрыяльным парку адбылася цырымонія ўступлення новага рэзідэнта. Ім стала беларускае прадпрыемства ТАА "АртБіяТэх". У мерапрыемстве прыняло ўдзел кіраўніцтва адміністрацыі і кампаніі па развіцці "Вялікага каменя".

"Кампанія плануе стварыць у індустрыяльным парку пляцоўку для вытворчасці высокатэхналагічных і навукаёмістых біятэхналагічных і хімічных прадуктаў, правядзення НДДКР і ажыццяўлення дыягнастычнай дзейнасці. Рэалізацыю праекта плануецца пачаць у трэцім квартале бягучага года, а запуск вытворчасці запланаваны на 2025 год", - адзначылі ў прэс-службе.

Кітайска-беларускі індустрыяльны парк "Вялікі камень" - асаблівая эканамічная зона са спецыяльным прававым рэжымам, размешчаная за 25 км ад Мінска. Прыярытэтныя для парка напрамкі - машынабудаванне, электроніка і тэлекамунікацыі, біятэхналогіі, фармацэўтыка, новыя матэрыялы, лагістыка, электронная камерцыя, захоўванне і апрацоўка вялікіх аб'ёмаў даных.

версія для друку

зрабіць стартавай

дабавіць у выбранае