Бізнес-навіны
Нязручны графік работы, бедны асартымент, пратэрміноўка. Лукашэнка запатрабаваў вырашыць тыповыя праблемы ў гандлі
26 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка сярод асноўных праблем у гандлі, якія патрабуюць своечасовага вырашэння, назваў нязручныя для насельніцтва графікі работы магазінаў, маршруты аўтакрам, бедны асартымент і наяўнасць тавараў са скончанымі тэрмінамі прыдатнасці. Аб гэтым кіраўнік дзяржавы заявіў 26 жніўня на нарадзе аб эфектыўнасці сістэмы гандлёвага абслугоўвання насельніцтва ў маштабах краіны, перадае карэспандэнт БЕЛТА.
Прэзідэнт звярнуў увагу, што сярод прэтэнзій насельніцтва да работы гандлю - маршруты аўтакрам. "Людзі скардзяцца на нязручны графік работы аўтамагазінаў і вельмі бедны асартымент. Мясцовыя ўлады не могуць гэта ўрэгуляваць?" - рытарычна спытаў Аляксандр Лукашэнка.
Нараўне з нерытмічнай арганізацыяй стацыянарнага і раз'язнога гандлю Прэзідэнт указаў на яшчэ адзін важны для спажыўца аспект - наяўнасць тавараў са скончанымі тэрмінамі прыдатнасці. "Няма тавару - дрэнна, але пратэрміноўка - гэта чырвоная лінія! Гэтага быць не павінна. А фактаў (такіх. - Заўвага БЕЛТА) дастаткова", - абурыўся кіраўнік дзяржавы.
Аляксандр Лукашэнка падкрэсліў, што адказнасць за абслугоўванне насельніцтва - на мясцовых органах улады. "Вы як ніхто ведаеце, што адбываецца ў рэгіёнах, і абавязаны арганізаваць гандаль у раёнах так, каб не было ніякіх нараканняў", - звярнуўся Прэзідэнт да ўдзельнікаў нарады.
Схема арганізацыі гандлю, паводле яго слоў, павінна быць простай: у раённым цэнтры працуюць некалькі добрых, максімальна напоўненых таварамі гандлёвых цэнтраў, у аграгарадках - магазіны меншыя. У вялікіх вёсках Прэзідэнт паставіў задачу навесці парадак і арганізаваць работу звычайнага магазіна, пабудаваць, адрамантаваць, забяспечыць кадрамі і таварамі нармальнай якасці. "І апошняе звяно - зручны для людзей развазны гандаль або дастаўка (каапсаюз, пошта, прыватнік - няважна)", - растлумачыў Аляксандр Лукашэнка.
версія для друку
зрабіць стартавай
дабавіць у выбранае