Бізнес-навіны

NEFCO прадаставіць "БНБ Лізінг" да 1 млн еўра для фінансавання развіцця рынку электратранспарту

2 жніўня, Мінск /Кар. БЕЛТА/. Паўночная экалагічная фінансавая карпарацыя (NEFCO) прадаставіць ТАА "БНБ Лізінг" да 1 млн еўра для фінансавання развіцця рынку электратранспарту ў Беларусі. Згоду на фінансаванне праекта даў урад, адпаведная пастанова Савета Міністраў ад 31 ліпеня 2019 года нумар 499 сёння афіцыйна апублікавана на Нацыянальным прававым інтэрнэт-партале, паведамляе БЕЛТА.

Згодна з прапанаваным NEFCO праектам плануецца, што ТАА "БНБ Лізінг" атрымае крэдытныя сродкі на суму да 1 млн еўра для фінансавання інвестыцый, звязаных з развіццём рынку электрычных транспартных сродкаў у Беларусі, для кліентаў лізінгавых паслуг у Беларусі.

Міністэрству эканомікі даручана пісьмова паведаміць Паўночнай экалагічнай фінансавай карпарацыі аб адсутнасці пярэчанняў з боку ўрада Беларусі па фінансаванні праекта.

NEFCO - міжнародная фінансавая арганізацыя, заснаваная ў 1990 годзе ўрадамі пяці паўночных краін: Даніі, Ісландыі, Нарвегіі, Фінляндыі і Швецыі. Асноўная мэта карпарацыі - аказваць станоўчае ўздзеянне на навакольнае асяроддзе. Яна фінансуе і рэалізуе выключна праекты зялёнага росту і кліматычныя праекты, надаючы прыярытэтнае значэнне праектам ва Усходняй Еўропе, рэгіёне Балтыйскага мора, Арктычным і Баранцавым рэгіёнах.

версія для друку

зрабіць стартавай

дабавіць у выбранае