Бізнес-навіны

Індыя зацікаўлена ў павелічэнні паставак у Беларусь морапрадуктаў

Фота з архiва

11 мая, Мінск /Кар. БЕЛТА/. Індыя зацікаўлена ў павелічэнні паставак у Беларусь морапрадуктаў. Аб гэтым паведаміў журналістам у Мінску па выніках В2В-сустрэчы дэлегацыі Упраўлення па развіцці экспарту морапрадуктаў Індыі з беларускімі дзелавымі коламі Надзвычайны і Паўнамоцны Пасол Рэспублікі Індыя ў Рэспубліцы Беларусь Ашок Кумар, перадае карэспандэнт БЕЛТА.

"Цяпер прамыя пастаўкі такой прадукцыі з Індыі ў Беларусь складаюць $2 млн. Да гэтай лічбы яшчэ трэба дадаць $8 млн -  морапрадукты, якія спачатку паступаюць у Расію. Мы хочам павялічыць на працягу некалькіх гадоў долю прамых паставак да $4-5 млн", - адзначыў Ашок Кумар.

Ён звярнуў увагу на высокі паказчык агульнага спажывання ў рэспубліцы морапрадуктаў. Доля Індыі нязначная. У асноўным экспартуюцца замарожаная рыба і крэветкі.

"Разглядаем магчымасць таго, каб перафармаціраваць пастаўкі. Экспартаваць без пасрэднікаў не толькі рыбу і крэветкі - гаворым і аб ракападобных, малюсках. Прамыя пастаўкі садзейнічаюць росту двухбаковага тавараабароту. Беларускія кампаніі таксама выйграюць ад таго, што заключаюць прамыя дагаворы", - адзначыў Ашок Кумар.

Намеснік генеральнага дырэктара Упраўлення па развіцці экспарту морапрадуктаў Індыі Асок Кумар расказаў, што візіт дэлегацыі накіраваны на дыверсіфікацыю экспарту. "Наша арганізацыя пастаўляе сваю прадукцыю ў 130 краін свету. Агульны аб'ём складае больш як $8 млрд. Прыехалі ў Беларусь, каб даведацца, якая прадукцыя запатрабавана. Цяпер аснова экспарту - замарожаныя крэветкі і сурымі. Хочам пашырыць наменклатуру за кошт філе рыбы, паўфабрыкатаў, якія могуць пастаўляцца не толькі ў магазіны, але і на перапрацоўчыя прадпрыемствы, у аб'екты грамадскага харчавання", - адзначыў Асок Кумар.

Намеснік старшыні Беларускай гандлёва-прамысловай палаты Алена Маліноўская адзначыла, што БелГПП цесна ўзаемадзейнічае з пасольствам, партнёрамі ў Індыі па арганізацыі такіх сустрэч па розных напрамках. Сённяшняя сустрэча прысвечана тэме морапрадуктаў. "Індыйскія калегі пастаўляюць значны аб'ём прадукцыі ў Расію, частка ідзе і ў Беларусь. Патэнцыял далёка не вычарпаны. Пастаўкі для нашых перапрацоўчых прадпрыемстваў могуць быць у разы большыя па прамых дагаворах", - адзначыла Алена Маліноўская.

Упраўленне па развіцці экспарту морапрадуктаў Індыі, створанае ў 1972 годзе пры Міністэрстве гандлю, з'яўляецца ключавым органам, які рэгулюе і пашырае экспарт морапрадуктаў краіны. Арганізацыя забяспечвае кантроль якасці, займаецца навукова-даследчымі распрацоўкамі, падтрымлівае мадэрнізацыю промыслу, аквакультуру і дыверсіфікацыю рынкаў.

В2В-сустрэча дэлегацыі Упраўлення па развіцці экспарту морапрадуктаў Індыі з беларускімі дзелавымі коламі арганізавана Беларускай гандлёва-прамысловай палатай ва ўзаемадзеянні з пасольствам Індыі ў Беларусі.

Адбыліся прэзентацыі беларускіх і індыйскіх прадпрыемстваў. Бакі абмеркавалі актуальныя напрамкі гандлёва-эканамічнага супрацоўніцтва.

версія для друку

зрабіць стартавай

дабавіць у выбранае