Бізнес-навіны

Навукаёмістая і высокатэхналагічная прадукцыя складае больш за трэць беларускага экспарту

Фота з архiва

19 студзеня, Мінск /Кар. БЕЛТА/. Навукаёмістая і высокатэхналагічная прадукцыя складае больш за трэць беларускага экспарту. Аб гэтым паведаміў у інтэрв'ю карэспандэнту БЕЛТА старшыня Дзяржаўнага камітэта па навуцы і тэхналогіях Сяргей Шлычкоў.

"Доля паставак навукаёмістай і высокатэхналагічнай прадукцыі ў агульным аб'ёме беларускага экспарту па выніках 9 месяцаў 2022 года склала 37,5 працэнта пры плане 34 працэнты. Паводле папярэдняй ацэнкі, паказчык інавацыйна актыўных арганізацый апрацоўчай прамысловасці па выніках 2022 года складзе 30,4 працэнта", - сказаў Сяргей Шлычкоў.

У Беларусі рэалізуецца Дзяржаўная праграма інавацыйнага развіцця Беларусі на 2021-2025 гады. У тым ліку ў 2022 годзе - 66 праектаў. Сем ужо завершаны, па пяці праектах уведзены ў эксплуатацыю аб'екты, створана больш за 700 новых працоўных месцаў. Старшыня ДКНТ расказаў пра найбольш значныя праекты. "У ААТ "Завод "Легмаш" арганізавана вытворчасць інавацыйнага абсталявання і камплектуючых вырабаў да яго для нафтагазавай прамысловасці. У Інстытуце фізікі НАН Беларусі створана высокатэхналагічная экспартна арыентаваная вытворчасць аптычных кампанентаў і лазерных сістэм з дыёдным напаўненнем новага пакалення. Завершаны праекты і на Баранавіцкім заводзе станкапрылад, у ААТ "Белкрэда", ТАА "Спецліт", ААТ "Ручайка", - адзначыў ён.

Вялікія планы і на 2023 год. Плануецца ўвод у эксплуатацыю па 19 праектах і выхад на праектную магутнасць па 17. "У тэхнапарку БНТУ "Палітэхнік" плануюць стварыць інавацыйна-вытворчы цэнтр па выпуску вырабаў медыцынскага прызначэння. Ва "Унітэхпрама" БДУ арганізуецца вытворчасць арыгінальных біярэзарбіруемых поліфункцыянальных лекавых прэпаратаў. Ва Уздзенскай ЦРБ ствараецца медыка-сацыяльны рэабілітацыйны цэнтр для пажылых і інвалідаў з выкарыстаннем інавацыйнай рабатызаванай тэхналогіі і сістэмай кантролю. А Мінскі малочны завод нумар 1, парадуе смачнай навінкай - сырам з белай плесняй", - праінфармаваў Сяргей Шлычкоў.

версія для друку

зрабіць стартавай

дабавіць у выбранае