Бізнес-навіны

Нацбанк назваў умову, пры якой можа быць зніжана стаўка рэфінансавання

Фота з архiва

4 красавіка, Мінск /Кар. БЕЛТА/. Нацыянальны банк не выключае зніжэння стаўкі рэфінансавання, калі індыкатары будуць паказваць доўгатэрміновасць тэндэнцыі па запаволенні інфляцыі. Аб гэтым заявіў журналістам старшыня праўлення Нацыянальнага банка Беларусі Раман Галоўчанка, паведамляе карэспандэнт БЕЛТА.

"Інфляцыя - адзін з ключавых паказчыкаў, якія мы кантралюем і прымаем усе неабходныя меры, каб ён заставаўся ў межах мэтавай велічыні, вызначанай указам кіраўніка дзяржавы. У пачатку года інфляцыя складаецца нават ніжэй за прагноз: калі па выніках двух месяцаў гадавая інфляцыя складала 5,6 працэнта, то па выніках сакавіка чакаецца, што яна знізіцца да 5,4 працэнта. Калі браць патыднёвы інтэрвал, яна ўжо ніжэй за 5 працэнтаў. Але, вядома, тут пэўную ролю адыгрывае тое, што было перанесена па часе павышэнне тарыфаў на ЖКП", - сказаў Раман Галоўчанка.

Нядаўна прынята рашэнне аб павышэнні цэн на паліва. "Гэта не нешта непрадбачанае, рашэнне прынята ў рамках планавага павышэння, у рамках тарыфнага сшытка, які быў вызначаны на год, і, вядома, у сілу тых падзей, якія цяпер адбываюцца на сусветных энергетычных рынках. Гэта пэўную прыбаўку да інфляцыі дасць, але мы з гэтай прычыны не хвалюемся, у нас гэта таксама ўлічана. Усё роўна агульная тэндэнцыя ідзе на запаволенне інфляцыі. Мы назіраем гэта па ўсіх кампанентах. Вельмі важна і тое, што запавольваюцца інфляцыйныя чаканні насельніцтва. Гэта значны статыстычны паказчык таго, як людзі адчуваюць асабістую інфляцыю", - адзначыў кіраўнік Нацбанка.

"Пакуль дынаміка пазітыўная. Калі яна замацуецца па выніках першага квартала і нашы апераджальныя індыкатары будуць паказваць доўгатэрміновасць гэтай тэндэнцыі, то не выключаю, што мы разгледзім пытанне аб зніжэнні стаўкі рэфінансавання, што ў сваю чаргу пазітыўна адаб'ецца на стаўках на крэдытным і дэпазітным рынках", - рэзюмаваў Раман Галоўчанка.

Прадстаўнікі Нацбанка сёння працавалі на тэрыторыі Стаўбцоўскага лясгаса ў рамках акцыі "Лес! Дабро! Парадак!". Высаджана 4,5 тыс. саджанцаў елкі і хвоі на плошчы 1,2 га.

версія для друку

зрабіць стартавай

дабавіць у выбранае