Бізнес-навіны

Нарошчванне паставак запатрабаванай прадукцыі. Селіверстаў аб стратэгіі работы на расійскім рынку

Фота з архiва

23 студзеня, Мінск /Кар. БЕЛТА/. Пасол Беларусі ў Расіі Юрый Селіверстаў, які 22 студзеня быў назначаны на гэту пасаду, расказаў журналістам аб стратэгіі работы па прасоўванні беларускіх тавараў на расійскі рынак, перадае карэспандэнт БЕЛТА.

Юрый Селіверстаў адзначыў, што задача мінімум - захаваць тыя пазіцыі, якія цяпер ёсць. "Вядома, іх трэба нарошчваць", - сказаў ён, звярнуўшы ўвагу на тое, што прадпрыемствы мадэрнізуюцца, выпускаюцца новыя віды прадукцыі. Калі раней актыўна выкарыстоўваліся трактары малой магутнасці (МТЗ-82), то цяпер вытворцы разглядаюць продаж больш магутных машын, з большай дабаўленай вартасцю. Суб'екты гаспадарання зацікаўлены ў такой тэхніцы. Нядаўна прэм'ер-міністр разглядаў на МТЗ пытанне выпуску трактароў магутнасцю 500 конскіх сіл. "Гэта новая прадукцыя, якая патрэбна нам, відавочна, такая ж сітуацыя ў Расійскай Федэрацыі, - патрэбна і ім. Нарошчваць менавіта тую прадукцыю, якая запатрабавана, - тут, мне здаецца, поле бязмежнае", - сказаў Юрый Селіверстаў.

Другі напрамак - замяшчэнне тавараў, якія ўжо не карыстаюцца дастатковым попытам. "Трэба ісці на апярэджанне. Мы - экспартная краіна, павінны гэтым не проста карыстацца - без гэтага не зможам развівацца", - адзначыў пасол.

У Маскву Юрый Селіверстаў накіруецца на наступным тыдні, калі будуць уладжаны фармальнасці, і адразу разлічвае пачаць выкананне службовых абавязкаў. У ліку важнейшых выклікаў ён назваў звужэнне спажывецкага попыту з прычыны высокіх ставак, правядзення больш жорсткай грашова-крэдытнай палітыкі. Гэта не дазваляе расійскім спажыўцам у такой колькасці, як раней, набываць беларускую тэхніку. Нарастае канкурэнцыя.

"Трэба, каб і тавары пастаўляліся своечасова, былі якасныя, і былі фінансавыя ўмовы, якія мы можам прапанаваць", - сказаў Юрый Селіверстаў, дадаўшы, што ўжо нельга працаваць у ранейшым "цяплічным рэжыме", калі тэхніка пастаўлялася па 100-працэнтнай перадаплаце.

Паводле слоў пасла, важна аператыўна прыстасавацца да новых умоў, ад чаго ў тым ліку залежыць выручка прадпрыемстваў. Ва ўрадзе выпрацавалі ўжо шэраг рашэнняў, у тым ліку па фінансавай падтрымцы, змяненні схемы паставак у лізінг. "Гэтыя рашэнні прыняты. Яны не з'яўляюцца абсалютна новымі, - сказаў Юрый Селіверстаў. - Мы будзем у пасольстве кантраляваць усе працэсы, інфармаваць урад, чаму не прымяняюцца тыя ці іншыя механізмы, аб якіх у краіне ўсе ўжо ведаюць".

Як паведамлялася, Юрый Селіверстаў, назначаны Надзвычайным і Паўнамоцным Паслом Рэспублікі Беларусь у Расійскай Федэрацыі, будзе таксама па сумяшчальніцтве з'яўляцца паўнамоцным прадстаўніком Беларусі пры Эканамічным савеце СНД, спецыяльным прадстаўніком Беларусі па пытаннях інтэграцыйнага супрацоўніцтва ў рамках Саюзнай дзяржавы, ЕАЭС, СНД і АДКБ.

Юрый Селіверстаў надзелены паўнамоцтвамі намесніка прэм'ер-міністра па пытаннях дзейнасці Беларусі ў рамках Саюзнай дзяржавы і адносін з Расіяй.

версія для друку

зрабіць стартавай

дабавіць у выбранае