Бізнес-навіны

Намеснік старшыні Белстата: у Беларусі склаўся пазітыўны трэнд у інфляцыйных працэсах

Наталля Тарасюк. Скрыншот відэа

5 сакавіка, Мінск /Кар. БЕЛТА/. У Беларусі склаўся пазітыўны трэнд у інфляцыйных працэсах. Аб гэтым заявіла намеснік старшыні Нацыянальнага статыстычнага камітэта Наталля Тарасюк у YouTube-праекце БЕЛТА "Па факце: рашэнні Першага".

Наталля Тарасюк звярнула ўвагу, што прыняцце дзяржавай своечасовых мер па рэгуляванні цэн дало магчымасць істотна знізіць інфляцыю. Так, калі на момант увядзення дзеючай сістэмы цэнаўтварэння ў верасні 2022 года інфляцыя склалася на ўзроўні 17,4 працэнта, то па выніках 2022 года яна знізілася да 12,8 працэнта. У 2023 годзе яе ўзровень быў 5,8 працэнта, а ў 2024-м - 5,2 працэнта.

"У нас склаўся пазітыўны трэнд у інфляцыйных працэсах", - падкрэсліла Наталля Тарасюк.

Акрамя таго, прынятыя меры далі магчымасць стрымаць абясцэньванне даходаў насельніцтва, станоўча паўплывалі на дабрабыт людзей і дазволілі знізіць узровень малазабяспечанасці ў Беларусі да мінімальнага за ўсю гісторыю назіранняў - 3,5 працэнта. Як растлумачыла спецыяліст, узровень малазабяспечанасці - гэта ўдзельная вага сярод насельніцтва людзей, у якіх наяўныя грашовыя даходы ніжэйшыя за пражытачны мінімум.

Намеснік старшыні Белстата таксама ўдакладніла, што індэкс спажывецкіх цэн (інфляцыя) у Беларусі разлічваецца штомесяц на падставе даных аб змяненні цаны амаль 500 тавараў і паслуг у 31 горадзе, у больш як 8 тыс. гандлёвых арганізацый. Штомесяц спецыялісты Белстата збіраюць звыш 70 тыс. цэнавых каціровак. У інфляцыю ўключаюць тавары як штодзённага попыту, так і працяглага выкарыстання. Рэгістратары параўноўваюць цэны на тавары па канкрэтных характарыстыках: вытворца, састаў, фасоўка, упакоўка і г.д. Для атрымання дакладнай аб'ектыўнай інфармацыі пры разліку інфляцыі параўноўваюцца цэны па канкрэтным вытворцу ў адным і тым жа гандлёвым аб'екце з адзінымі спажывецкімі ўласцівасцямі.

Наталля Тарасюк лічыць, што ў той эканамічнай сітуацыі, якая складваецца на знешніх рынках, і пры высокім узроўні інфляцыі ў суседніх з Беларуссю краінах неабходна кіруемае цэнаўтварэнне. І не трэба разлічваць, што рынак усё адрэгулюе так, каб гэта адпавядала інтарэсам нашай краіны і грамадства. "Усе меры, якія прымаюцца для цэнавага рэгулявання, накіраваны на тое, каб не было злоўжыванняў, калі фарміруецца цана ў розніцы на тавар. Таму што розныя мерапрыемствы паказвалі, што завышаліся гандлёвыя надбаўкі, была празмерная маржа на пэўныя тавары. Каб гэтага не было, а была справядлівая цана, і былі прыняты меры па цэнавым  рэгуляванні", - сказала яна.

версія для друку

зрабіць стартавай

дабавіць у выбранае