Бізнес-навіны

НАК Беларусі плануе наладзіць цеснае супрацоўніцтва з калегамі з ААЭ

21 мая, Мінск /Кар. БЕЛТА/. Пашырэнне двухбаковага супрацоўніцтва ў розных напрамках алімпійскага руху абмяркоўвалася на сустрэчы генеральнага сакратара НАК Беларусі Паліны Галавіной з кіраўніцтвам НАК Аб'яднаных Арабскіх Эміратаў, паведамілі БЕЛТА ў прэс-службе НАК Беларусі.

Генеральны сакратар НАК ААЭ, кіраўнік федэрацыі мотаспорту ААЭ Махамед бен Сулаем Ахмед у пачатку сустрэчы закрануў важныя тэмы станаўлення спартсмена. "Немагчыма стаць алімпійскім чэмпіёнам адразу на наступны дзень. Каб дасягнуць пэўных вяршынь, неабходна працаваць, вучыцца, умець слухаць і чуць. З кожным годам усё больш складана канкурыраваць у спорце вышэйшых дасягненняў. Яшчэ адзін важны аспект на шляху да перамогі - кантроль сваіх эмоцый. Трэба заўсёды быць гатовым да ўсяго", - падкрэсліў Махамед бен Сулаем Ахмед.

Паліна Галавіна адзначыла важнасць не толькі станаўлення спартсмена падчас актыўных выступленняў у спорце, але і самарэалізацыі атлетаў пасля завяршэння прафесійнай кар'еры. "У канцы красавіка мы ўпершыню правялі нацыянальны форум атлетаў, які быў накіраваны на сацыялізацыю спартсменаў пасля заканчэння іх дзейнасці ў спорце вышэйшых дасягненняў. На мой погляд, вельмі важна падтрымліваць атлетаў, даць ім магчымасць праявіць сябе і ў іншых напрамках. Дарэчы, мы запрашаем і спартсменаў Аб'яднаных Арабскіх Эміратаў прыняць удзел у чарговым форуме атлетаў, які плануем правесці ў наступным годзе", - дадала Паліна Галавіна.

Абодва бакі былі салідарны, што сёння неабходна абавязковая падтрымка спартсменаў на дзяржаўным узроўні.

Асноўнай тэмай сустрэчы стала, безумоўна, падрыхтоўка да Алімпійскіх гульняў у няпростай эпідэміялагічнай сітуацыі, магчымасць арганізацыі сумесных вучэбна-трэніровачных збораў і праектаў па папулярызацыі алімпійскага руху.

Прадстаўнікоў НАК ААЭ зацікавіў вопыт беларускай школы дзюдо (у Абу-Дабі дзейнічае алімпійская школа па гэтым відзе спорту). Яны таксама выказалі зацікаўленасць у развіцці такіх відаў спорту, як стральба стэндавая і таэквандо. Беларускі бок у сваю чаргу прапанаваў арганізаваць візіт у школу па дзюдо Абу-Дабі алімпійскага чэмпіёна Афін-2004 Ігара Макарава, які прадаўжае сваю спартыўную дзейнасць у якасці трэнера і з'яўляецца заснавальнікам сваіх школ па гэтым відзе спорту. Гэта стане адным з першых практычных крокаў у развіцці міжнароднага супрацоўніцтва дзвюх арганізацый.

Паліна Галавіна запрасіла дэлегацыю НАК ААЭ прыняць удзел ва ўрачыстых мерапрыемствах з нагоды 30-гадовага юбілею НАК Беларусі. Акрамя таго, плануецца замацаваць далейшыя напрамкі па ўзаемадзеянні падпісаннем мемарандума аб супрацоўніцтве ў бягучым годзе.

версія для друку

зрабіць стартавай

дабавіць у выбранае