3 сакавіка, Мінск /Уладзімір Мацвееў - БЕЛТА/. На базе ЗАТ "Атлант" плануецца стварэнне холдынга па вытворчасці складанай бытавой тэхнікі. Гэта пытанне сёння абмяркоўвалася ў час наведвання Прэзідэнтам Беларусі Аляксандрам Лукашэнкам ЗАТ "Атлант", перадае карэспандэнт БЕЛТА.
Адказваючы на пытанне аб тым, ці прынята канчатковае рашэнне аб стварэнні холдынга, першы віцэ-прэм'ер Уладзімір Сямашка сказаў: "Працэс пайшоў". "Адназначна наспела рашэнне аб тым, што ААТ "Электраапаратура" (Гомель) павінна ўвайсці ў гэты холдынг", - дадаў ён. Акрамя таго, абмяркоўваецца магчымасць удзелу ў холдынгу ААТ "Брэстгазаапарат", у якім беларуская дзяржава валодае блакіровачным пакетам акцый.
Як адзначыў Уладзімір Сямашка, ЗАТ "Атлант" фактычна з'яўляецца так званым змешаным холдынгам, сутнасць якога ў тым, што самае магутнае прадпрыемства адначасова з'яўляецца і кіруючай кампаніяй. У прыватнасці, ЗАТ "Атлант" пабудавала эфектыўную сістэму кіравання прадпрыемствамі, ствараючы поўнасцю падкантрольныя філіялы або дабіваючыся кантрольнага пакета ў заснаваных прадпрыемствах. У якасці філіялаў створаны Баранавіцкі станкабудаўнічы завод, Завод бытавой тэхнікі па вытворчасці пральных машын. Заснаваны ТАА "Белхол", ТАА "Атлант-Брокар", ТАА "Шапчыцы-Агра" і сумесныя прадпрыемствы ТАА "Атлант-СМ" у Смаленску, ТАА "Атлант-Сэрвіс" у Варшаве і АТЗТ "Атлант-Украіна" ў Кіеве. Галаўны завод - Мінскі завод халадзільнікаў - кіруе непасрэдна фінансамі філіялаў і праз сваю долю ў заснаваных прадпрыемствах.
Як было даложана кіраўніку дзяржавы, які пацікавіўся паказчыкамі эфектыўнасці ЗАТ, у цэлым "Атлант" з'яўляецца плацежаздольным і фінансава ўстойлівым прадпрыемствам. Так, цяпер у сярэднім па ЗАТ "Атлант" выпрацоўка на аднаго рабочага з улікам расходаў на сацыяльную сферу складае каля $62 тыс., а аналагічны паказчык на заводзе бытавой тэхнікі па вытворчасці пральных машын дасягае 100 тыс. еўра. Фактычна створаныя вытворчасці ні ў чым не ўступаюць лепшым еўрапейскім аналагам.
Рэнтабельнасць рэалізаванай прадукцыі, работ і паслуг перавышае 10 працэнтаў. Акрамя таго, кіраўніцтву прадпрыемства ўдалося значна скараціць аб'ём энергазатрат у сабекошце выпускаемай прадукцыі. Калі 10 гадоў таму гэты паказчык складаў каля 14 працэнтаў, то апошні час ён знізіўся да 4,5 працэнта.
У цэлым аб'ём рэалізацыі асноўнай прадукцыі і паслуг ЗАТ "Атлант" за 2010 год склаў $604,9 млн., з якіх на долю Мінскага завода халадзільнікаў прыпадае 63 працэнты.
Прадпрыемства рэалізуе сваю прадукцыю ў многія краіны свету. Акрамя краін СНД яна адгружалася ў Германію, Венгрыю, Латвію, Ізраіль, Літву, Манголію, Польшчу, Сербію, Славакію, Балгарыю, Аўстрыю, Нідэрланды, Італію, Швейцарыю, Эстонію і Францыю.
Пн | Аўт | Сер | Чцв | Пт | Сб | Нядз |
---|