Бізнес-навіны

Міжнародная асацыяцыя біржаў адзначыла ўклад БУТБ у развіццё міжбіржавога супрацоўніцтва

Фота з архiва

24 сакавіка, Мінск /Кар. БЕЛТА/. Беларуская ўніверсальная таварная біржа ўдастоена ганаровай граматы Міжнароднай асацыяцыі біржаў (МАБ) як адзін з самых актыўных удзельнікаў гэтага наднацыянальнага галіновага аб'яднання. Аб гэтым паведамілі БЕЛТА ў прэс-службе БУТБ.

Біржу ўзнагародзілі за значны ўклад у развіццё міжбіржавых сувязей, умацаванне міжнароднага партнёрства і пашырэнне інтэграцыйнага ўзаемадзеяння паміж біржавымі інстытутамі, сістэмную работу па развіцці стратэгічнага дыялогу, рэалізацыі сумесных ініцыятыў і пашырэнні сумесных праектаў у рамках асацыяцыі, высокі прафесіяналізм, стратэгічнае бачанне і актыўную пазіцыю ў пытаннях інтэграцыі біржавых таварных рынкаў. Такім абгрунтаваннем суправадзіў прысуджаную БУТБ грамату выканаўчы дырэктар МАБ Аляксей Купрын. Узнагарода была ўручана старшыні праўлення БУТБ Аляксандру Асмалоўскаму ў рамках Х Міжнароднага форуму "Біржавы таварны рынак", які прайшоў у Маскве.

"Выбудоўваючы супрацоўніцтва з замежнымі біржавымі пляцоўкамі, мы нязменна прытрымліваемся прынцыпаў узаемнай выгады, адкрытасці і імкнення да канкрэтных практычных вынікаў. Таварныя біржы ў любой краіне свету - гэта перш за ўсё інструменты, якія працуюць у інтарэсах эканомікі. Яны садзейнічаюць рэалізацыі экспартнага патэнцыялу і фарміраванню празрыстай сістэмы цэнаўтварэння на ўнутраным і знешнім рынках. Таму, аб'ядноўваючы намаганні з калегамі з партнёрскіх біржаў, мы не толькі ўзмацняем станоўчы эфект ад прымянення біржавога механізма, але і вырашаем надзённыя задачы бізнесу нашых краін: здымаем гандлёвыя бар'еры, спрашчаем доступ да стратэгічных рэсурсаў, прадастаўляем цэнавыя арыенціры, пашыраем збытавыя магчымасці", - падкрэсліў Аляксандр Асмалоўскі.

БУТБ з'яўляецца ўдзельніцай МАБ з 2008 года, а старшыня праўлення біржы ўваходзіць у склад Савета асацыяцыі. У 2011 годзе па ініцыятыве БУТБ пры МАБ быў створаны Камітэт па таварных рынках. Мэта гэтай структуры - актывізацыя міжбіржавых інтэграцыйных працэсаў і развіццё трансгранічнага біржавога гандлю.

МАБ была заснавана ў 2000 годзе ў Маскве. Сёння асацыяцыю прадстаўляюць 17 арганізацый з 10 краін. У 2025 годзе ў Мінску прайшоў 25-ы Агульны гадавы сход членаў МАБ і міжнародны біржавы форум, арганізатарам якога выступіла БУТБ.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Яе галоўная функцыя - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае