Бізнес-навіны
МТЗ плануе паставіць у Расію 16 тыс. трактароў
Фота з архiва
31 жніўня, Мінск /Кар. БЕЛТА/. Мінскі трактарны завод у бягучым годзе плануе паставіць у Расію каля 16 тыс. трактароў. Аб гэтым сказаў генеральны дырэктар прадпрыемства Віталь Воўк, перадае карэспандэнт БЕЛТА.
"Нам хацелася б мець долю рынку ў Расіі каля 70 працэнтаў, цяпер у нас больш за 60 працэнтаў. Мы хочам быць прадстаўлены не толькі ў сельскай гаспадарцы, але і ў камунальнай сферы, лясной гаспадарцы. Сёння мы ўсё больш пашыраем сваю прысутнасць. Упэўнены, што да канца года выйдзем на лічбу не меншую за 16 тыс. трактароў, - сказаў Віталь Воўк. - У бягучым годзе па холдынгу імкнёмся выйсці на вытворчасць трактарнай тэхнікі больш за 50 тыс. адзінак. За першае паўгоддзе ўжо вырабілі 24 тыс.".
Паводле слоў гендырэктара, МТЗ - экспартна арыентаванае прадпрыемства, у свой час пастаўкі ажыццяўляліся ў 120 краін свету. "Сёння патрабуюцца новыя тэхнічныя рашэнні, камплектуючыя, наяўнасць фірменнага сэрвісу. Удзел у пастаўках МТЗ за межы Саюзнай дзяржавы выгадны ўсім, паколькі адно рабочае месца на Мінскім трактарным заводзе забяспечвае прыкладна шэсць рабочых месцаў на прадпрыемствах Расійскай Федэрацыі. Гэта вельмі добры лакаматыў для развіцця нашых працоўных і кааперацыйных сувязей", - адзначыў Віталь Воўк.
Мінскі трактарны завод заснаваны 29 мая 1946 года. Са жніўня 2014 года ператвораны ў "МТЗ-Холдынг". Гэта адзін з найбуйнейшых вытворцаў сельскагаспадарчай тэхнікі не толькі ў краінах СНД, але і ва ўсім свеце. На прадпрыемстве працуе больш за 16 тыс. чалавек. Заказчыкам прапануюцца больш за 100 мадэлей трактароў у больш як 200 зборачных варыянтах для ўсіх кліматычных і эксплуатацыйных умоў. ААТ "МТЗ" распрацоўвае, вырабляе і экспартуе колавыя трактары і запасныя часткі да іх, арганізуе на ліцэнзійнай аснове іх вытворчасць за мяжой, аказвае паслугі па наладжванні і правядзенні сэрвісу пастаўленых машын, праводзіць навучанне па эксплуатацыі і тэхнічным абслугоўванні выпускаемай тэхнікі.
версія для друку
зрабіць стартавай
дабавіць у выбранае