Бізнес-навіны

МТЗ, "Гомсельмаш" і Пецярбургскі трактарны завод створаць Саюз прамыслоўцаў

29 сакавіка, Мінск /Кар. БЕЛТА/. ААТ "МТЗ", ААТ "Гомсельмаш" і АТ "Пецярбургскі трактарны завод" ствараюць Саюз прамыслоўцаў "Прагрэс". Устаноўчы дакумент плануецца падпісаць 30 сакавіка на палях Беларуска-расійскага бізнес-форуму ў Санкт-Пецярбургу, паведамілі карэспандэнту БЕЛТА ў прэс-службе Мінскага трактарнага завода.

"Мы з партнёрамі доўга абмяркоўвалі магчымасць і неабходнасць стварэння Саюза прамыслоўцаў, прапрацоўвалі канкрэтныя стратэгічныя пасылы ў выкананне даручэнняў кіраўнікоў дзяржаў аб наладжванні цеснай прамысловай кааперацыі прадпрыемстваў Расіі і Беларусі. Наша некамерцыйная арганізацыя прызначана дапамагчы прастымуляваць прамкааперацыю, развіць патэнцыял і спецыялізацыю прадпрыемстваў дзвюх краін, надаць дадатковы імпульс рэальнай лакалізацыі і рэальнаму імпартазамяшчэнню", - расказаў генеральны дырэктар ААТ "МТЗ" Віталь Воўк.

Асноўнымі відамі дзейнасці саюза вызначаны вывучэнне кан'юнктуры рынку, арганізацыя семінараў, канферэнцый, выставак і іншых прадстаўнічых мерапрыемстваў, дзейнасць у галіне стандартызацыі і тэхнічнага рэгулявання. Таксама плануецца сумесна вывучаць заканадаўчую базу і ўносіць прапановы па яе ўдасканаленні, фарміраваць эфектыўную кадравую палітыку, ажыццяўляць экспертную падтрымку і інфармацыйнае забеспячэнне.

Саюз плануецца зарэгістраваць на тэрыторыі Расійскай Федэрацыі.

"На гэтым этапе мы пазіцыянуем сябе як міжкраінавае аб'яднанне і гаворым аб прадпрыемствах Саюзнай дзяржавы, але адкрыты для кампаній усяго Еўразійскага эканамічнага саюза, якія падзяляюць нашы мэты і задачы", - падкрэсліў Віталь Воўк.

версія для друку

зрабіць стартавай

дабавіць у выбранае