Бізнес-навіны

Імпартазамяшчэнне па дарожных картах. Як Завод горнага воску прыходзіць на выручку санкцыйным прадпрыемствам

Фота з архiва

16 чэрвеня, Мінск /Кар. БЕЛТА/. Завод горнага воску рэгулярна прыходзіць на выручку айчынным вытворцам, якія сутыкаюцца з санкцыйнымі абмежаваннямі па імпарце. Як прадпрыемства малатанажнай хіміі распрацоўвае розныя віды прадукцыі для асваення новых рынкаў збыту, расказаў яго дырэктар Віктар Лукша, паведамілі БЕЛТА ў прэс-службе канцэрна "Белнафтахім".

"Тэмпы росту аб'ёмаў вытворчасці імпартазамяшчальнай прадукцыі ў 2024 годзе ў параўнанні з 2023-м склалі 115 працэнтаў. У мінулым годзе імпартазамяшчэнне вялося па дарожных картах, падпісаных з арганізацыямі Міністэрства прамысловасці і ДВА "Белэнерга", - удакладніў кіраўнік. - Сёння мы прадаўжаем работу ў гэтым напрамку".

Так, са спецыялістамі "Гродна Азота", напрыклад, наладжана супрацоўніцтва ў рамках дарожнай карты па распрацоўцы і адабрэнні антызлежвальнай дабаўкі да карбаміду. Сумесна з Гомельскім хімічным заводам ствараюцца ўзоры аналагічнай прадукцыі для карбамідзмяшчальных угнаенняў.

На прадпрыемстве "Беларуснафта" праходзяць доследна-прамысловыя выпрабаванні гідраўлічнага масла вытворчасці Завода горнага воску. Ацэньваецца магчымасць яго прымянення замест імпартных аналагаў. На Рэчыцкім заводзе вырабаў з металу і ДВА "Белэнерга" такая работа вядзецца ў адносінах да рэдуктарнага масла, у ААТ "Беларуськалій" - пылападаўляльнікаў.

На Баранавіцкім станкабудаўнічым заводзе, філіяле "Атланта", на працягу двух месяцаў вяліся выпрабаванні доследнай партыі масленай змазачна-ахаладжальнай вадкасці, распрацаванай у якасці аналага імпартнага прадукту. Ужо атрымана станоўчае заключэнне, паступіла заяўка на пастаўку дадатковага аб'ёму гэтага прадукту для прадаўжэння выпрабаванняў. А Беларуская атамная электрастанцыя па выніках двухгадовага апрабавання адобрыла кансервуючы гідрафобны запаўняльнік Завода горнага воску.

Працуе прадпрыемства і над завязваннем сувязей з расійскімі навуковымі арганізацыямі. У прыватнасці, з Нацыянальным даследчым тэхналагічным універсітэтам "МІСіС" абмяркоўваюцца перспектыўныя напрамкі супрацоўніцтва ў галіне вытворчасці новых відаў прадукцыі, а менавіта распрацоўка рэцэптуры і тэхналагічнага працэсу атрымання пракатнай эмульсіі. А з навуковым цэнтрам "Праблем перапрацоўкі мінеральных і тэхнагенных рэсурсаў" Санкт-Пецярбургскага горнага ўніверсітэта вывучаюцца перспектывы выкарыстання, у тым ліку мадэрнізацыі, наяўных вытворчасцей. Такім чынам Завод горнага воску мае намер пашырыць перапрацоўваемую сыравінную базу.

Завод горнага воску працуе на рынку ўжо больш за 60 гадоў і з'яўляецца адзіным вытворцам парафінаў, мадэльных саставаў, парафінавых эмульсій і ахоўных воскаў у Беларусі. Прадукцыя знайшла шырокае прымяненне як на прадпрыемствах рэспублікі, так і за яе межамі. Геаграфія паставак налічвае больш за 20 краін блізкага і далёкага замежжа. Інавацыі, мадэрнізацыя вытворчасці, строгі кантроль якасці, пашырэнне асартыменту выпускаемай прадукцыі, пастаяннае развіццё каналаў збыту даюць магчымасць не толькі заставацца лідарам у сваёй галіне ў Беларусі, але і складаць сур'ёзную канкурэнцыю калегам на знешніх рынках.

версія для друку

зрабіць стартавай

дабавіць у выбранае