Бізнес-навіны

Мінскі аўтазавод выпусціў токены "МАЗ-СПОРТаўта" для прыцягнення інвестараў

Фота з архiва

25 сакавіка, Мінск /Кар. БЕЛТА/. ААТ "МАЗ" - кіруючая кампанія холдынга "БЕЛАЎТАМАЗ" эмітавала токены "МАЗ-СПОРТаўта" на крыптаплатформе Finstore.by, якая ўваходзіць у холдынг Банка БелВЭБ даччынай кампаніі ТАА "ДФС", паведамілі БЕЛТА ў прэс-службе прадпрыемства.

Аб'ём эмісіі складае $2 млн, тэрмін абарачэння - два гады, намінальны кошт - $100. Даход складае 6 працэнтаў гадавых і выплачваецца кожны месяц. "Набыць токены можа любая фізічная і юрыдычная асоба - рэзідэнт Беларусі. Для гэтага неабходна зарэгістравацца на платформе www.finstore.by і прайсці нескладаную працэдуру ідэнтыфікацыі", - расказалі ў прэс-службе.

Праект ажыццяўляецца сумесна з Банкам БелВЭБ. Асноўная мэта - павышэнне ўвагі да спартыўнай каманды і альтэрнатыўнае прыцягненне інвестараў.

Спартыўная каманда "МАЗ-СПОРТаўта" заснавана ў 2010 годзе. "Менавіта ў гэты час з'явілася ідэя стварэння заводскай каманды для пашырэння тэхнікі Мінскага аўтамабільнага завода як інавацыйнага і якаснага прадукту, папулярызацыі брэнда, павелічэння лаяльнасці і павышэння пазнаваемасці маркі МАЗ на сусветным узроўні. Акрамя таго, удзел каманды ў міжнародных спартыўных мерапрыемствах садзейнічае фарміраванню іміджу Беларусі як дзяржавы, што мае значны навукова-тэхнічны і канструктарскі патэнцыял", - дадалі ў прэс-службе.

Дзякуючы правільна выпрацаванай канцэпцыі па папулярызацыі, удзелу ў буйнейшых міжнародных ралі-рэйдах спартыўная каманда "МАЗ-СПОРТаўта" займае пачэснае 2-е месца ў агульным сусветным заліку па аўтамабільным спорце, а брэнд і прадукцыя МАЗ вядома больш як у 190 краінах.

Мінскі аўтамабільны завод - адно з буйнейшых беларускіх машынабудаўнічых прадпрыемстваў, якое спецыялізуецца на выпуску вялікагрузных аўтамабіляў, спецтэхнікі, аўтобусаў, тралейбусаў і прычапной тэхнікі. Гандлёвая марка МАЗ шырока вядома ў СНД і далёкім замежжы. Тэхніка адпавядае экалагічным стандартам Еўра-5, 6. З канвеера завода сыходзяць седлавыя цягачы, бартавыя аўтамабілі, шасі пад устаноўку рознага спецабсталявання - усяго больш за 500 мадэлей і мадыфікацый.

версія для друку

зрабіць стартавай

дабавіць у выбранае