Бізнес-навіны

Мінпрам аб дасягненнях прамкомплексу ў галіне якасці: нацэлены на далейшае ўкараненне інавацый

18 ліпеня, Мінск /Кар. БЕЛТА/. Работа па павышэнні якасці на прадпрыемствах Мінпрама не спыняецца, прамысловы комплекс нацэлены на далейшае ўкараненне інавацый у вытворчасць. Аб гэтым заявіў журналістам на 26-й цырымоніі ўзнагароджання пераможцаў конкурсу на саісканне прэміі ўрада за дасягненні ў галіне якасці 2024 года ў Мінску першы намеснік міністра прамысловасці Андрэй Канюшка, перадае карэспандэнт БЕЛТА.

Заслужаныя ўзнагароды ўручаны 40 арганізацыям: 14 сталі лаўрэатамі прэміі ўпершыню, 14 пацвердзілі званне лаўрэата, 12 прызнаны дыпламантамі конкурсу. У тым ліку адзначаны поспехі прамысловага комплексу.

Андрэй Канюшка адзначыў, што ўдзел у конкурсе для прадпрыемстваў - стымул укараняць інавацыі, фактар далейшай папулярызацыі тавараў. "Прамысловасць - лакаматыў нашай эканомікі. Радуе, што прадпрыемствы становяцца пераможцамі. Прыемны той факт, што многія пацвярджаюць сваё першынство. Шэраг прадпрыемстваў, такія як БЕЛАЗ, Мінскі маторны завод і іншыя, - пяць-сем, а то і больш разоў. Гэта сведчыць аб тым, што работа не спыняецца ні на адзін дзень. Ніхто не спачывае на лаўрах, ствараюцца новыя тавары, прымяняюцца новыя тэхналогіі", - адзначыў Андрэй Канюшка.

Паводле яго слоў, тавар, адзначаны знакам якасці, не толькі грамадскае прызнанне, але і дадатковы стымул да яго больш актыўнай рэалізацыі як на ўнутраным, так і на знешнім рынках.

У развіццё прадпрыемстваў штогод укладваюцца значныя сродкі, пашыраецца наменклатура выпускаемай прадукцыі. У прыклад ён прывёў Мінскі маторны завод, дзе асвоены новыя напрамкі ў вытворчасці рухавікоў, новую тэхніку БЕЛАЗа. "Прадпрыемствы працуюць якасна, зладжана. У наступным годзе таксама разлічваем на рэзультат", - дадаў Андрэй Канюшка. Асобна ў сувязі з гэтым ён адзначыў галіну станкабудавання, дзе рэалізуецца адпаведная саюзная праграма.

версія для друку

зрабіць стартавай

дабавіць у выбранае