Бізнес-навіны

МАЗ павінен быць устойлівы да знешніх шокаў - Галоўчанка

Раман Галоўчанка

12 мая, Мінск /Кар. БЕЛТА/. Мінскі аўтамабільны завод павінен быць устойлівы да знешніх шокаў, заявіў прэм'ер-міністр Раман Галоўчанка, наведваючы прадпрыемства, перадае карэспандэнт БЕЛТА.

"У цэлым неабходна паглядзець устойлівасць прадпрыемства да знешніх шокаў, наколькі яно канкурэнтаздольнае цяпер, наколькі фінансавыя патокі даюць магчымасць забяспечваць стабільную работу, што яшчэ можа зрабіць дзяржава для таго, каб падтрымаць прадпрыемства ў няпростай сітуацыі", - сказаў Раман Галоўчанка.

Ён звярнуў увагу, што не выпадкова выбраў МАЗ для свайго першага наведвання ў якасці кіраўніка ўрада. "Гэта адзін з тых брэндаў, якія праславілі рэспубліку. Пытанні ўстойлівага функцыянавання, устойлівага развіцця МАЗа, вядома, у фокусе кіраўніцтва краіны і ўрада", - сказаў прэм'ер-міністр.

Раман Галоўчанка адзначыў, што цяпер даволі складаны час для ўсіх аўтавытворцаў, машынабудаўнікоў, але пытанні, з якімі сутыкаецца МАЗ, ляжаць не толькі ў плоскасці наступстваў, выкліканых каранавірусам, - замарожвання паставак, прасядання традыцыйных рынкаў.

"З боку дзяржавы і так зроблена нямала ў плане фінансавай дапамогі, але давайце паглядзім, наколькі яна эфектыўна выкарыстоўваецца. І калі неабходна - што яшчэ можна зрабіць, дзе падставіць плячо, зразумела, на аснове ўзаемных абавязацельстваў", - рэзюмаваў Раман Галоўчанка.

У час наведвання прэм'ер-міністру прадэманстравалі тэхніку МАЗ, у тым ліку першы электробус. Ён таксама пагутарыў з камандай пілотаў "МАЗ-СПОРТаўта", якія рыхтуюцца да гонкі "Дакар-2021".

версія для друку

зрабіць стартавай

дабавіць у выбранае