Бізнес-навіны

МАЗ паставіў партыю аўтобусаў у Манголію

Фота МАЗ

11 снежня, Мінск /Кар. БЕЛТА/. Мінскі аўтамабільны завод паставіў у Манголію для патрэб Міністэрства надзвычайных сітуацый аўтобусы МАЗ 257030 і МАЗ 231060, паведамілі БЕЛТА ў прэс-службе прадпрыемства.

Аўтобусы выраблены ў паўночным выкананні і адаптаваны для эксплуатацыі ў самай халоднай сталіцы свету. "Клімат Манголіі - рэзка кантынентальны, тэмпература ў зімовы перыяд можа дасягаць мінус 49 градусаў, таму паўночнае выкананне аўтатэхнікі, якое дапамагае выкарыстоўваць яе пры экстрэмальна нізкіх тэмпературах, - адзін з асноўных крытэрыяў пры пастаўках у гэту краіну", - расказалі ў прэс-службе.

Гэта далёка не першая пастаўка тэхнікі МАЗ у Манголію. "Наша прадпрыемства і Манголію звязваюць даўнія партнёрскія адносіны. Аўтатэхніку ў гэты рэгіён пастаўляем штогод. Напрыклад, у 2015 годзе на вуліцы мангольскіх гарадоў выйшлі новыя аўтобусы МАЗ 215, а ў бягучым годзе Мінскі аўтамабільны завод паставіў у гэту краіну больш за 70 адзінак спецыяльнай тэхнікі - пажарныя аўтацыстэрны рознай ёмістасці, аўталесвіцы, аўтамабілі пеннага і паветрана-пеннага тушэння. У партыю таксама ўвайшлі парашковыя, камбінаваныя, штабныя аўтамабілі, мабільныя пункты кіравання і нават мабільны шпіталь са станцыяй дэзапрацоўкі", - растлумачылі на заводзе.

Мінскі аўтамабільны завод - адно з буйнейшых беларускіх машынабудаўнічых прадпрыемстваў, якое спецыялізуецца на выпуску вялікагрузных аўтамабіляў, спецтэхнікі, аўтобусаў, тралейбусаў і прычапной тэхнікі. Гандлёвая марка МАЗ шырока вядома ў СНД і далёкім замежжы. Тэхніка адпавядае экалагічным стандартам Еўра-5, 6. З канвеера завода сыходзяць седлавыя цягачы, бартавыя аўтамабілі, шасі пад устаноўку рознага спецабсталявання - усяго больш за 500 мадэлей і мадыфікацый.

версія для друку

зрабіць стартавай

дабавіць у выбранае