Бізнес-навіны

21 ліпеня, Кішынёў /Андрэй Гусін - БЕЛТА/. Магілёўская вобласць зацікаўлена ў супрацоўніцтве з Гагаузскай аўтаноміяй на поўдні Малдовы ў галіне насенняводства, а таксама мае намер стварыць сумеснае прадпрыемства для зборкі малых трактароў. Аб гэтым заявіла башкан (кіраўнік) Гагаузіі Ірына Улах, каменціруючы вынікі свайго візіту ў Беларусь у складзе дэлегацыі Малдовы ў перыяд з 16 па 17 ліпеня, перадае карэспандэнт БЕЛТА.

Кіраўнік аўтаноміі падкрэсліла, што ў час візіту малдаўскай дэлегацыі ў Мінск адбыліся сустрэчы з Прэзідэнтам Беларусі, кіраўніцтвам урада і абедзвюх палат парламента. "Нам удалося сустрэцца з Прэзідэнтам Беларусі Аляксандрам Лукашэнкам, які вельмі добра ведае аб сітуацыі ў Гагаузіі і праінфармаваны аб эканамічных і палітычных працэсах у аўтаноміі", - адзначыла башкан аўтаноміі.

Кіраўнік рэгіёна асабліва падкрэсліла падпісанне пагаднення аб супрацоўніцтве з Мінскай вобласцю і плана дзеянняў з Магілёўскай вобласцю. Дакументы былі падпісаны ў прысутнасці прэзідэнтаў дзвюх краін. Паводле слоў Ірыны Улах, кіраўніцтва Магілёўскай вобласці зацікаўлена ў супрацоўніцтве з Гагаузіяй у галіне насенняводства. "Беларускіх калег цікавіць супрацоўніцтва па насенняводстве: насенне кукурузы, сланечніка і люцэрны. Губернатар Магілёўскай вобласці таксама выказаў ідэю аб тым, каб адкрыць у Гагаузіі сумеснае прадпрыемства па зборцы малых трактароў", - растлумачыла Ірына Улах.

У гэтым кантэксце кіраўнік аўтаноміі дала даручэнні арганізаваць візіт дэлегацый Магілёўскай і Мінскай абласцей у Гагаузію. Прадугледжваецца, што план дзеянняў па рэалізацыі пагаднення аб супрацоўніцтве з Мінскай вобласцю будзе падпісаны ў лістападзе 2015 года ў час інвестыцыйнага форуму.