Бізнес-навіны

Лукашэнка ўзгадніў назначэнне новага гендырэктара ў Беларускую шкляную кампанію

27 сакавіка, Мінск /Кар. БЕЛТА/. Прэзідэнт Беларусі Аляксандр Лукашэнка 27 сакавіка ўзгадніў назначэнне Дзяніса Юрчанкі генеральным дырэктарам РУП "Кіруючая кампанія холдынга "Беларуская шкляная кампанія", перадае карэспандэнт БЕЛТА.

Да гэтага часу Дзяніс Юрчанка кіраваў Гродзенскім шклозаводам. Ён растлумачыў, што Беларуская шкляная кампанія цяпер аб'ядноўвае ўсе дзяржаўныя шкляныя прадпрыемствы краіны. Аднак у Беларусі ёсць яшчэ два прыватныя заводы, якія не ўваходзяць у холдынг.

"Гэта значыць, вы не ў інтарэсах гэтых прыватных прадпрыемстваў працуеце?" - удакладніў Аляксандр Лукашэнка.

"Мы не сапернічаем. У нейкай сферы мы ўзаемадзейнічаем у тым ліку. У нас няма рознагалоссяў, але яны пакуль трымаюцца адасоблена, як прыватныя прадпрыемствы, - расказаў Дзяніс Юрчанка. - А так, вынікі працы Беларускай шкляной кампаніі паказваюць, што не дарэмна вамі было ўзгоднена рашэнне аб аб'яднанні беларускіх шкляных прадпрыемстваў разам для вырашэння асноўных праблем і далейшага развіцця шкляной галіны ў Рэспубліцы Беларусь".

"А па адчуваннях, яны (прыватныя прадпрыемствы. - Заўвага БЕЛТА) да вас прыйдуць?" - спытаў Прэзідэнт.

"Я думаю, яны не адмовяцца, калі мы ім прапануем, - адзначыў кіраўнік прадпрыемства. - У нас няма праблем з рэалізацыяй. Мы сумесна забяспечваем унутраны рынак".

Кіраўнік дзяржавы падкрэсліў, што сілай у холдынг нікога заганяць не трэба, але і адштурхоўваць прыватнікаў не трэба. "Рэсурсы, сыравіна і іншае - яна ж у вас практычна з адной крыніцы, можна сказаць. Таму чаго канкурыраваць там, дзе трэба дамаўляцца. І гэта не ва ўрон і не на шкоду дзяржаве", - заўважыў Аляксандр Лукашэнка.

Прэзідэнт таксама пацікавіўся, як наладжаны цяпер экспарт беларускай шкляной прадукцыі.

"З кастрычніка для нас закрыўся еўрапейскі рынак. Але мы змаглі пераарыентавацца на бліжэйшы да нас расійскі рынак і прадаўжаем яго развіваць. Пакуль сітуацыя складваецца нядрэнна", - праінфармаваў Дзяніс Юрчанка.

версія для друку

зрабіць стартавай

дабавіць у выбранае