Бізнес-навіны

Лукашэнка запатрабаваў узмацніць культуру земляробства

28 жніўня, Кіраўскі раён /Кар. БЕЛТА/. Прэзідэнт Беларусі Аляксандр Лукашэнка ў час рабочай паездкі ў Кіраўскі раён Магілёўскай вобласці звярнуў увагу на недапушчальнасць сітуацый, калі неапрацаваныя палі зарастаюць пустазеллем, перадае карэспандэнт БЕЛТА.

Кіраўнік дзяржавы адразу пасля прыбыцця падрабязна пацікавіўся ў кіраўніка ААТ "Рассвет імя К.П.Арлоўскага" Аляксандра Багеля, як ідуць справы ў гаспадарцы. Прэзідэнту далажылі пра самыя розныя аспекты работы "Рассвета": ход уборачнай, ураджайнасць сельгаскультур, жывёлагадоўлю. Выслухаўшы яго, Аляксандр Лукашэнка канстатаваў, што справы ў "Рассвете" ідуць нядрэнна. "Малайчына, што ў парадак прывёў гаспадарку", - пахваліў кіраўніка Прэзідэнт.

У той жа час пра суседнія гаспадаркі такога сказаць нельга. Размова зайшла і пра гаспадаркі Мінскай вобласці. "Паміж Чэрвенем і Беразіно (я заўсёды за гэтыя раёны перажываю Мінскай вобласці) - катастрофа. Палі не апрацаваны. Вось, што мяне непакоіць", - заўважыў Прэзідэнт.

Пры гэтым, дадаў Аляксандр Лукашэнка, гэта такія ж палі, як і ў "Рассвете", дзе сітуацыя куды лепшая. "Начальнікі ў нас, як і ў былыя часы, ездзяць па дарогах. Вось па дарозе едзеш, пры дарогах усё апрацавана, добра - амаль як у "Рассвете". А далей (я ж бачу, з верталёта ўсё відаць) усё гэтым сумнікам зарасло. Так, мужыкі, справа не пойдзе", - сказаў кіраўнік дзяржавы.

Гаворачы пра "Рассвет імя К.П.Арлоўскага", Аляксандр Лукашэнка нагадаў, што ў савецкія часы гэта гаспадарка ў Кіраўскім раёне дасягала найвышэйшых вынікаў не толькі ў маштабах БССР, але і ўсяго СССР. Першым кіраўніком "Рассвета" быў Кірыл Арлоўскі, якога Аляксандр Лукашэнка назваў заслужаным чалавекам. "Калі б не ён, такой гаспадаркі не было б", - упэўнены кіраўнік дзяржавы.

Як паведамлялася раней, Аляксандр Лукашэнка ў час рабочай паездкі ў Магілёўскую вобласць наведаў поле бульбы ў гаспадарцы "Рассвет імя К.П.Арлоўскага". У цэнтры ўвагі кіраўніка дзяржавы - ход уборкі бульбы, тэхналогія яе дапрацоўкі і захоўвання, развіццё бульбаводства ў цэлым у краіне.

версія для друку

зрабіць стартавай

дабавіць у выбранае