Бізнес-навіны

Лукашэнка заклікаў развіваць супрацоўніцтва з Кітаем на ўзроўні галін і рэгіёнаў

Фота з архiва

31 ліпеня, Мінск /Кар. БЕЛТА/. Практычную работу з Кітаем неабходна разгарнуць на ўзроўні галін і рэгіёнаў. Аб гэтым Прэзідэнт Беларусі Аляксандр Лукашэнка заявіў у час нарады з кіраўнікамі дыпламатычных прадстаўніцтваў, перадае карэспандэнт БЕЛТА.

Кіраўнік дзяржавы адзначыў, што Кітай па-ранейшаму застаецца ключавым партнёрам Беларусі на далёкай дузе. Ужо сёння тавараабарот з КНР складае амаль $8,5 млрд і на мільярд перавышае гандаль з усім Еўрасаюзам. "Але і тут за агульнай лічбай трэба бачыць больш шырокую карціну супрацоўніцтва і ролю Кітая для будучыні нашай эканомікі", - упэўнены Прэзідэнт.

Аляксандр Лукашэнка нагадаў, што ў Беларусі на вышэйшым узроўні пастаўлена задача стымуляваць сумеснае тэхналагічнае развіццё і забяспечыць прыход самых сучасных кітайскіх тэхналогій. Сферы таксама дакладна вызначаны: станкабудаванне, мікраэлектроніка, нафтахімія, фармацэўтыка і гэтак далей. "Разгортвайце практычную работу на ўзроўні галін і рэгіёнаў", - заклікаў беларускі лідар.

Ён запатрабаваў ад урада і пасольства ў Кітаі ўсёабдымнае садзейнічанне на ўсіх этапах распрацоўкі канкрэтных сумесных праектаў - ад аналізу рынку і работы з інвестарамі да каардынацыі і суправаджэння.

"У цэлым азіяцкаму вектару мы ўдзяляем даволі шмат увагі. На вышэйшым узроўні адпрацоўваюцца В'етнам, Інданезія, Іран, Манголія, М'янма, Пакістан. МЗС дакладвае аб перспектывах па Тайландзе і Лаосе", - сказаў кіраўнік дзяржавы.

Пры гэтым, канстатаваў ён, тэмп росту экспарту ў Азію пакуль ніжэйшы (127,3 працэнта), чым у цэлым па краіне ў перыяд з 2020 года: "Таму трэба дзейнічаць значна актыўней, асабліва з улікам сітуацыі на расійскім рынку".

версія для друку

зрабіць стартавай

дабавіць у выбранае