Бізнес-навіны

Лукашэнка: узровень энергетычнай незалежнасці Беларусі неабходна падняць яшчэ вышэй да 2030 года

Фота з архiва

18 снежня, Мінск /Кар. БЕЛТА/. Узровень энергетычнай незалежнасці Беларусі неабходна падняць яшчэ вышэй да 2030 года. Аб гэтым Прэзідэнт Беларусі Аляксандр Лукашэнка заявіў, звяртаючыся з Пасланнем да беларускага народа і парламента, перадае карэспандэнт БЕЛТА.

Прэзідэнт Беларусі адзначыў, што энергетыка - гарант эканамічнага развіцця і пытанне самадастатковасці дзяржавы. "Перавагі Беларусі ў гэтым аспекце відавочныя. Пабудаваная АЭС сур'ёзна ўмацавала нашу незалежнасць энергетычную. Але да 2030 года трэба падняць гэты ўзровень яшчэ вышэй", - заявіў Аляксандр Лукашэнка.

Беларускі лідар адзначыў, што магутнасці станцыі далі магчымасць асучасніваць адпаведную інфраструктуру і стымуляваць развіццё электратранспарту. "За гэты час мы падключылі 2 млн кв.м новага электрыфікаванага жылля. Сучасныя беларускія электробусы курсіруюць не толькі ў Мінску і абласных цэнтрах, але і ў "эксперыментальных раёнах" - Жодзіне, Шклове, Наваполацку", - прывёў прыклады кіраўнік дзяржавы.

Ён падкрэсліў, што ўраду і губернатарам трэба пашыраць такі вопыт паўсюдна. "Запусціце да гарадоў-спадарожнікаў камфортныя надзейныя электробусы! Я хачу, каб мяне пачулі і тыя, хто "ціктокаецца" ў гэтых ціктоках. Я ніколі не быў супраць свабоднага выбару чалавека, грамадзяніна, на чым яму перамяшчацца: на маршрутках ці на аўтобусах. Але калі людзі стаяць у чарзе і грамадзяне да мяне звяртаюцца, я не магу на гэта не звярнуць увагі. Мы неадкладна зрабілі нямала аўтобусаў на газаматорным паліве, рухавіках унутранага згарання, электробусаў і запусцілі па маршруце. Выбірайце", - сказаў Аляксандр Лукашэнка.

Прэзідэнт назваў надзейнасць энергетычных аб'ектаў вельмі актуальным пытаннем. "Міністэрству энергетыкі трэба неадкладна заняцца будаўніцтвам ліній усіх класаў напружання, а таксама падстанцый з разумным запасам магутнасці. Таму што будзе генерыраваць атамная электрастанцыя, а гэты прадукт давесці да насельніцтва мы не зможам. Правады старыя, па-народнаму кажучы, падстанцыі ніякія - тую магутнасць, якая патрэбна ў тым ці іншым раёне, вёсцы, не вытрымліваюць", - сказаў кіраўнік дзяржавы.

Пры гэтым, канстатаваў ён, праводзімая мадэрнізацыя будзе ісці строга ў рамках устаноўленага парадку росту тарыфаў для насельніцтва і прадпрыемстваў. "Людзі да гэтага прывыклі. Раней было $5 у год, цяпер - палова базавай велічыні, Br21. Ніякіх скачкоў тут не будзе. І я хачу папярэдзіць урад. Нават дзверы не адкрывайце тым спецыялістам ад энергетыкі, якія да вас прыходзяць і гавораць: "Не ўкладваемся, сабекошт вышэйшы за цану". Ну, дык працуйце, каб сабекошт быў ніжэйшы", - запэўніў ён.

версія для друку

зрабіць стартавай

дабавіць у выбранае