Бізнес-навіны

Лукашэнка прапануе шукаць добрыя інвестпраекты для развіцця ўжо існуючых вытворчасцей

30 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка ў час рабочай паездкі ў Брэст прапанаваў шукаць добрыя інвестыцыйныя праекты для развіцця існуючых вытворчасцей, у якіх у беларусаў ёсць кампетэнцыі, перадае карэспандэнт БЕЛТА.

Прэзідэнт адзначыў, што ствараць новыя вытворчасці ў раёнах не заўсёды ёсць неабходнасць, калі там ужо дзейнічаюць прадпрыемствы, якія забяспечваюць людзей работай і зарплатай. Часам там дастаткова правесці мадэрнізацыю, каб павялічыць вытворчасць прадукцыі, тым самым павялічыўшы колькасць рабочых месцаў.

Адзін з нядаўніх прыкладаў такога падыходу - рэканструкцыя Нарачанскага вытворчага ўчастка Мінскага малочнага завода №1 па праграме "Адзін раён - адзін праект". "У Мінскай вобласці па новых тэхналогіях павялічылі вытворчасць сыроў. Гэта таксама добры праект у развіццё старога, - звярнуў увагу Аляксандр Лукашэнка. - Людзі будуць заняты, зарплата будзе. Але галоўнае, што мы гэта ўмеем рабіць".

"У нас узяты курс на прыдумванне нейкіх аб'ёмных праектаў па тэме, якая ў нас ніколі не культывавалася ў краіне. У той жа час у развіццё праектаў некаторых вытворчасцей нам патрэбны інвестыцыі", - заўважыў кіраўнік дзяржавы.

Гаворачы аб вытворчасцях, у якіх у беларусаў ёсць кампетэнцыі, ён звярнуў увагу на Брэсцкі электралямпавы завод. Асноўнай прадукцыяй прадпрыемства былі лямпы напальвання, хоць цяпер ва ўсім свеце расце попыт на святлодыёдныя лямпы. Кампетэнцыі па іх вытворчасці ёсць і ў айчынных вытворцаў, у тым ліку ў Брэсцкага электралямпавага завода.

"Лямпачка нам патрэбна святлодыёдная. У Беларусі на святлодыёд трэба мяняць усё - гэта эканамічна, выгадна. Чаму не ўкладвацца сюды, дзе ёсць школа і кампетэнцыі? - задаў слушнае пытанне Прэзідэнт. - Трэба ва ўрадзе ўзяць крэн на развіццё таго, што мы ўмеем".

версія для друку

зрабіць стартавай

дабавіць у выбранае