Бізнес-навіны
Лукашэнка назваў ураджай на палях дастойным, нягледзячы на няпросты год
28 жніўня, Кіраўскі раён /Кар. БЕЛТА/. Год быў няпросты, але ўраджай на палях дастойны. Аб гэтым Прэзідэнт Беларусі Аляксандр Лукашэнка заявіў на нарадзе па актуальных пытаннях развіцця бульбаводства ў Беларусі, перадае карэспандэнт БЕЛТА.
"Уборачная кампанія ў разгары. Усё, аб чым прасіў урад, зроблена. Цяпер вынік залежыць ад вас. Паралельна з бульбай ідзе ўборка буракоў, у тым ліку цукровых, кукурузы на зерне, капусты, морквы. Год быў няпросты, але, паўтараюся, ураджай на палях дастойны. Трэба яго сабраць і захаваць", - падкрэсліў Прэзідэнт.
У сувязі з гэтым размова зайшла аб умовах захоўвання, у тым ліку бульбы, якая і была ў цэнтры ўвагі рабочай паездкі Аляксандра Лукашэнкі ў Кіраўскі раён. У размешчанай тут гаспадарцы "Рассвет імя К.П.Арлоўскага" кіраўнік дзяржавы азнаёміўся з тэхналогіямі дапрацоўкі і захоўвання бульбы. "Бачылі сёння прыстасаванае сховішча, дзе нядрэнна захоўваецца бульба", - дадаў ён.
Разам з тым трэба захаваць не толькі бульбу, але і іншую агародніну, падкрэсліў беларускі лідар. "Нам жа трэба і буракі, і цыбулю, і моркву, і капусту пэўны перыяд захаваць. Таму па-гаспадарску трэба да гэтага падыходзіць. Надышоў час, - упэўнены Аляксандр Лукашэнка. - Калі праспім гэты час, быць бядзе".
Лукашэнка папярэдзіў, што адсутнасць айчыннай бульбы ў магазінах недапушчальна
28 жніўня, Кіраўскі раён /Кар. БЕЛТА/. Прэзідэнт Беларусі Аляксандр Лукашэнка папярэдзіў кіраўніцтва гандлёвых сетак аб недапушчальнасці адсутнасці на паліцах якаснай і даступнай айчыннай бульбы. Кіраўнік дзяржавы заявіў аб гэтым на нарадзе па актуальных пытаннях развіцця бульбаводства ў Беларусі, перадае карэспандэнт БЕЛТА.
"Звяртаю ўвагу кіраўнікоў гандлёвых сетак, што адсутнасць у магазінах якаснай даступнай айчыннай бульбы будзе мець для ўсіх сумныя вынікі", - папярэдзіў кіраўнік дзяржавы.
Спецыялісты запэўніваюць, што ў гэтым годзе ў Беларусі ўдасца сабраць мільён тон бульбы, што на трэць больш, чым у мінулым годзе. А разам з насельніцтвам ураджай можа скласці каля 3,5 млн тон. Паводле слоў Аляксандра Лукашэнкі, гэта дасць магчымасць не толькі цалкам забяспечыць сябе, але і экспартаваць. "Мінулая вясна паказала, што наша бульба на знешніх рынках ідзе нарасхват. Даходзіла да ажыятажнага попыту, і нібыта ў нас былі пустыя паліцы ў магазінах", - дадаў ён.
Прэзідэнт нагадаў, што ўраду было даручана прыняць усе меры, каб сітуацыя не паўтарылася. Паводле яго слоў, беларусы ўвесь год павінны мець магчымасць купіць айчынную бульбу (а таксама цыбулю, моркву, капусту) па прымальнай цане.
Пры гэтым, падкрэсліў беларускі лідар, не трэба бясконца мыць бульбу, каб прадаць яе даражэй. "Любы селянін ведае, што мытая доўга не захоўваецца, гніе. І ў выніку вы яе проста выкінеце. Таму падыходзьце разумна, па-гаспадарску", - даручыў Аляксандр Лукашэнка.
версія для друку
зрабіць стартавай
дабавіць у выбранае