Бізнес-навіны

30 лістапада, Орша /Міхаіл Маціеўскі - БЕЛТА/. Рашэнне аб мадэрнізацыі Аршанскага льнокамбіната было правільным, але яго рэалізацыя павінна была быць больш эфектыўнай. Аб гэтым Прэзідэнт Беларусі Аляксандр Лукашэнка заявіў сёння ў Оршы на нарадзе па развіцці льняной галіны і перапрацоўцы лёну, перадае карэспандэнт БЕЛТА.

Кіраўнік дзяржавы адзначыў, што рашэнне аб развіцці ў краіне льняной галіны было прынята даўно, і сёння позна ўжо спрачацца, ці правільным яно аказалася. "Я лічыў, лічу, а цяпер і вы пераканаліся ў тым, што мы зрабілі правільна", - падкрэсліў Аляксандр Лукашэнка.

Разам з тым, паводле яго слоў, работа да гэтага часу наладжана неэфектыўна. "Любіць трэба сваю краіну. І любоў павінна выяўляцца не ў балбатні і словах, а ў справах", - сказаў Прэзідэнт.

Аляксандр Лукашэнка звярнуў увагу, што ў былыя часы лён вырошчвалі многія краіны: Францыя, Кітай, Расія, Нідэрланды, Бельгія, Казахстан і Беларусь. "Мы былі на шостым-сёмым месцы, калі не браць Савецкі Саюз, - канстатаваў ён. - А цяпер апынуліся на другім месцы. Францыя яшчэ крыху варушыцца па вытворчасці лёну, толькі якасна ў адрозненне ад нас. Кітай згарнуў вытворчасць, засталося зусім крыху. Ільнаводства ў Расіі загнулася зусім".

У той жа час, заўважыў кіраўнік дзяржавы, людзі цэняць ільняную прадукцыю, попыт на яе толькі расце. "А для нас, чарнобыльскай рэспублікі, Украіны і Расіі гэта наогул "лякарства". Ільняныя тканіны - гэта паратунак для нас. Свет даўно зразумеў, асабліва Еўропа: лёну быць. А колькасць вытворцаў змяншаецца. Дык правільна мы зрабілі, што калісьці заняліся мадэрнізацыяй вытворчасці, асабліва на гэтым ільнокамбінаце - гэта наша гісторыя? Абсалютна правільна. І жыццё гэта пацвердзіла, - заявіў Прэзідэнт. - Здавалася б, чаго ў мяне такі паганы настрой? Таму што мы дрэнна ставімся да гэтага".

"Праходзячы па гэтых цэхах, кіраўнік прадпрыемства проста сказаў: вось кароткае валакно, вось гэта зрабілі, тое зрабілі. Цудоўныя тканіны робяць з кароткага льновалакна, мы іх бачылі. Але гэта ўсяго 30-35 працэнтаў ён перапрацаваў. А астатнія 65-70 працэнтаў дзе? Упакаваў, некуды адправіў, нешта сам зрабіў. Сёння 60-70 працэнтаў кароткага льновалакна не даюць таго даходу, той эфектыўнасці і прыбытку, які мы маглі б мець", - канстатаваў Аляксандр Лукашэнка.