Бізнес-навіны

Лукашэнка лічыць, што дынаміка рэалізацыі інвестпраектаў Беларусі за мяжой павінна быць вышэйшая

Фота з архiва

18 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка лічыць, што дынаміка рэалізацыі інвестыцыйных праектаў за мяжой павінна быць вышэйшая. Аб гэтым журналістам заявіў кіраўнік Адміністрацыі Прэзідэнта Дзмітрый Крутой па выніках даклада кіраўніку дзяржавы, перадае карэспандэнт БЕЛТА.

Паводле слоў Дзмітрыя Крутога, на наступным тыдні ў кіраўніка дзяржавы запланавана нарада аб рэалізацыі важнейшых інвестыцыйных праектаў Беларусі за мяжой. Неабходнасць правядзення мерапрыемства прадыктавана ў тым ліку нядаўняй вялікай замежнай камандзіроўкай Аляксандра Лукашэнкі. "Кіраўнік дзяржавы лічыць, што дынаміка гэтых інвестпраектаў не зусім здавальняючая. Цяпер вельмі добры момант замацавацца на рынках гэтых краін", - падкрэсліў Дзмітрый Крутой.

Кіраўнік Адміністрацыі Прэзідэнта прывёў прыклад Інданезіі - чацвёртай краіны ў свеце па колькасці насельніцтва, якая зведвае патрэбнасць у рознай прадукцыі. Разам з тым аднаго толькі гандлю для развіцця супрацоўніцтва ўжо мала. "Каб устойліва і на доўгія гады замацавацца на гэтых рынках, нам патрэбны сумесныя інвестыцыйныя праекты", - падкрэсліў ён.

У першую чаргу гэта датычыцца зборачных вытворчасцей. Пры гэтым размова не ідзе аб тым, каб перанесці гатовыя беларускія прадпрыемствы ў тыя ці іншыя рэгіёны свету. "Трэба, як гаворыць Прэзідэнт, правільным чынам падзяліць ланцужок дабаўленай вартасці, каб сумесны прадукт, які будзе ў Інданезіі, Кітаі, Узбекістане або краінах Афрыкі, мог падпадаць пад мясцовыя праграмы субсідзіравання. Гэта, вядома, задача нашага прамысловага, аграпрамысловага блока і іншых галін, якія займаюцца адпаведнымі праектамі", - канстатаваў кіраўнік Адміністрацыі Прэзідэнта.

Паводле яго слоў, Аляксандр Лукашэнка заслухае даклады службовых асоб, якія замацаваны за тымі ці іншымі рэгіёнамі і нясуць адказнасць за інвестпраекты. "Думаю, што гэта будзе вельмі добрая і карысная размова на злобу дня", - сказаў на заканчэнне Дзмітрый Крутой.

версія для друку

зрабіць стартавай

дабавіць у выбранае