Бізнес-навіны

Лукашэнка даручыў банкам садзейнічаць прадпрыемствам у знешнеэканамічнай дзейнасці

9 верасня, Мінск /Кар. БЕЛТА/. Прэзідэнт Беларусі Аляксандр Лукашэнка на нарадзе з апаратам Нацыянальнага банка і кіраўніцтвам банкаў паставіў задачу па ўсебаковым садзейнічанні прадпрыемствам у ажыццяўленні знешнеэканамічнай дзейнасці, перадае карэспандэнт БЕЛТА.

"Як гэта ні дзіўна гучыць, але ўрад і Нацбанк ніяк не дамовяцца аб парадку ўзаемадзеяння дзяржорганаў і прадпрыемстваў пры ўзнікненні праблемных сітуацый з міжнароднымі плацяжамі. Як у байцы "Лебедзь, Шчупак і Рак". Кожны цягне ў свой бок, а воз праблем і цяпер там. Трэба выключыць верагоднасць любых фінансавых страт для краіны. Валютная выручка павінна паступаць у поўным аб'ёме", - падкрэсліў кіраўнік дзяржавы.

У сувязі з гэтым Прэзідэнт паставіў перад Нацбанкам і банкаўскай сістэмай задачу па ўсебаковым садзейнічанні прадпрыемствам у ажыццяўленні знешнеэканамічнай дзейнасці. Размова ідзе аб некалькіх напрамках. У іх ліку Аляксандр Лукашэнка абазначыў пашырэнне банкаўскай карэспандэнцкай сеткі ў дружалюбных і нейтральных краінах і правядзенне разлікаў у нацыянальных валютах краін - асноўных гандлёвых партнёраў.

Прэзідэнт таксама звярнуў увагу на неабходнасць выкарыстання дружалюбных сістэм перадачы фінансавай інфармацыі і вызначэнне аптымальных і эфектыўных схем узаемадзеяння ўдзельнікаў трансгранічных плацяжоў. Акрамя таго, адзначыў ён, варта задзейнічаць эфектыўныя альтэрнатыўныя механізмы разлікаў, такія як пераўступка доўгу, разлікі ў крыптавалютах, наяўнай форме і гэтак далей.

версія для друку

зрабіць стартавай

дабавіць у выбранае