Бізнес-навіны

Лукашэнка арыентуе на атрыманне ў Беларусі ўраджаю алейнага семя рапсу каля 1 млн тон

8 жніўня, Смалявіцкі раён /Кар. БЕЛТА/. Прэзідэнт Беларусі Аляксандр Лукашэнка арыентуе аграрыяў на атрыманне ў краіне ўраджаю алейнага семя рапсу каля 1 млн т штогод. Аб гэтым кіраўнік дзяржавы заявіў пры наведванні ААТ "Азярыцкі-Агра" ў Смалявіцкім раёне, дзе азнаёміўся ў тым ліку з ходам уборкі азімага рапсу, перадае карэспандэнт БЕЛТА.

Тое, што вырошчваць азімы рапс выгадна і гэтым у Беларусі трэба займацца, справа ўжо вырашаная. Культура дае магчымасць атрымліваць вельмі карысны алей (па вытворчасці якога Беларусь ужо займае, паводле розных даных, 5 ці 6 месца ў свеце) і бялок для патрэб жывёлагадоўлі. Плюс на палях пасля вырошчвання рапсу выдатна растуць збожжавыя культуры, таму яго называюць "папярэднікам".

Цяпер застаецца ўдасканаліць тэхналогіі і сарты. Прэзідэнт пацікавіўся, як ідзе работа над айчыннымі гібрыднымі сартамі рапсу. Калі ў 1980-я гады яе наогул не вырошчвалі ў краіне, а потым, паводле ацэнкі замежных экспертаў, лічылі, што для яе прыдатная толькі невялікая частка глеб, то цяпер дзякуючы распрацаванай у нас тэхналогіі вырошчвання, падтрымцы дзяржавы і асабіста Прэзідэнта азімы рапс паспяхова займае ўсё больш і больш пасяўных плошчаў.

Цяпер застаецца ўдасканаліць тэхналогіі і сарты. Прэзідэнт пацікавіўся, як ідзе работа над айчыннымі гібрыднымі сартамі рапсу. Як растлумачыла загадчык аддзела алейных культур НПЦ НАН Беларусі па земляробстве Ядвіга Пілюк, у краіне стараюцца вытрымліваць прапорцыю выкарыстання насення свайго і імпартнага 80/20. Аляксандр Лукашэнка арыентуе на нарошчванне долі ўласнага насення і паляпшэнне яго якасці. За апошнія 10 гадоў створаны 30 сартоў рапсу, попыт на іх вялікі - прададзена 110 т насення і гэта ва ўмовах жорсткай канкурэнцыі з больш як 20 буйнейшымі фірмамі свету.

"Нам трэба мільён атрымаць дакладна - алейнага семя (у бягучым годзе. - Заўвага БЕЛТА)", - паставіў задачу Аляксандр Лукашэнка па ўраджаі азімага рапсу.

"У гэтым годзе мы яго атрымаем, валавы збор. Будзем глядзець, як дадасць нам яравы рапс", - удакладніла Ядвіга Пілюк. Спецыяліст растлумачыла, што ў гэтым годзе для азімага рапсу вельмі складаныя ўмовы надвор'я, тым не менш, паводле прагнозаў, удасца сабраць не менш як мільён тон рапсу, але гэта агульны валавы збор, а алейнага семя будзе крыху менш. Хоць у мінулым годзе ўраджай менавіта алейнага семя быў 1 млн т.

"Нам бы на гэтым утрымацца", - арыентаваў Прэзідэнт на паказчыкі мінулага года.