Бізнес-навіны

Лукашэнка арыентуе банкі на фінансавую падтрымку эканомікі

9 верасня, Мінск /Кар. БЕЛТА/. Прэзідэнт Беларусі Аляксандр Лукашэнка на нарадзе з апаратам Нацыянальнага банка і кіраўніцтвам банкаў арыентаваў іх на фінансавую падтрымку эканомікі, перадае карэспандэнт БЕЛТА.

Адна з задач, якую кіраўнік дзяржавы паставіў перад Нацыянальным банкам і ўсёй банкаўскай сістэмай, - фінансавая падтрымка эканомікі. Прэзідэнт адзначыў, што крэдытныя рэсурсы заўсёды адыгрывалі важную ролю ў вытворчай дзейнасці любога прадпрыемства, асабліва калі размова заходзіць аб неабходнасці мадэрнізацыі, маштабавання бізнесу або стварэння новых вытворчасцей.

"У нашай краіне попыт на крэдытныя рэсурсы традыцыйна высокі. З пачатку бягучай пяцігодкі штогадовы аб'ём выдачы банкамі крэдытаў суб'ектам гаспадарання і насельніцтву павялічыўся ў два разы, - падкрэсліў Аляксандр Лукашэнка. - У той жа час назіраецца зніжэнне долі крэдытаў (пазык) банкаў у інвестыцыях у асноўны капітал з 27 працэнтаў у 2014 годзе да 12 працэнтаў у 2024-м".

Паводле яго слоў, значная доля гэтых сродкаў накіравана на крэдытную падтрымку рэальнага сектара эканомікі. За сем месяцаў бягучага года юрыдычныя асобы атрымалі ад банкаў Br103 млрд крэдытных сродкаў.

"Аднак задача па фінансаванні эканомікі яшчэ не вырашана. І важна не колькасць, а якасць фінансавых укладанняў. Кожны ўкладзены рубель павінен даваць максімальную аддачу. Гэта інструкцыя да дзеяння абсалютна для ўсіх", - заявіў кіраўнік дзяржавы.

Прэзідэнт падкрэсліў, што банкаўская сістэма павінна гэтаму актыўна садзейнічаць, забяспечваючы эфектыўнае і рацыянальнае размеркаванне рэсурсаў у эканоміцы. "Крэдытаванне эфектыўных інвестыцыйных праектаў, якія маюць высокі экспартны патэнцыял, накіраваных на імпартазамяшчэнне або развіццё рэгіёнаў, павінна быць безумоўным прыярытэтам для нашага банкаўскага сектара. Часам трэба дапамагчы кліенту, падказаць, дзе можна знізіць затраты", - дадаў ён.

"Вядома, для бесперабойнага фінансавання інвестыцыйных праектаў патрабуюцца рэсурсы. Адказваючы на пытанне, дзе іх узяць... Акцэнт неабходна рабіць на прыярытэтным прыцягненні ў банкаўскі сектар рублёвых зберажэнняў", - лічыць беларускі лідар.

версія для друку

зрабіць стартавай

дабавіць у выбранае