Бізнес-навіны

22 чэрвеня, Мінск /Кар. БЕЛТА/. Важным пытаннем з'яўляецца правядзенне скаардынаванай навукова-тэхнічнай стратэгіі з партнёрамі па ЕАЭС. Аб гэтым заявіў Прэзідэнт Беларусі Аляксандр Лукашэнка сёння на V Усебеларускім народным сходзе, перадае карэспандэнт БЕЛТА.

"У апошнія гады і Расія, і Казахстан стварылі шэраг вытворчасцей, аналагічных існуючым у Беларусі. Хоць дамаўляліся не аб гэтым. Па сутнасці, такія дубліруючыя вытворчасці ствараюць празмерны націск на агульным рынку нашых краін. Прадпрыемствы вымушаны канкурыраваць паміж сабой, у той час як стратэгічна больш правільна, наадварот, узмацніць спецыялізацыю на асобных сегментах і развіваць кааперацыйныя сувязі. Навошта траціць рэсурсы, якіх і так мала, на стварэнне таго, што ўжо ёсць, нават калі б гэтых рэсурсаў было шмат? Паколькі вытворчасць - гэта яшчэ і навуковая, канструктарская школа, сістэма падрыхтоўкі кваліфікаваных кадраў. І ўсё гэта каласальныя затраты", - сказаў Аляксандр Лукашэнка.

Кіраўнік дзяржавы падкрэсліў, што ўраду і ўпаўнаважаным службовым асобам неабходна актыўней вырашаць пытанні ў статутных органах Еўразійскага эканамічнага саюза. "Мэта нязменная і зразумелая - мы павінны стварыць паўнацэнны агульны рынак без выключэнняў і абмежаванняў", - адзначыў Аляксандр Лукашэнка.

Ён акцэнтаваў увагу на тым, што Беларусь гатова з партнёрамі па ЕАЭС паглыбляць кааперацыйныя сувязі, развіваць спецыялізацыю, сумесна прасоўваць прадукцыю на далёкіх рынках, а з Расійскай Федэрацыяй стварыць вытворчасці - фінішныя тэхналагічныя перадзелы, якія выкарыстоўваюць расійскую сыравіну і паўфабрыкаты і арыентаваны на ёмісты рынак Еўрапейскага саюза. "Гэта могуць быць нафтапрадукты, хімічныя валокны і ніці, а таксама прадукцыя металургіі", - падкрэсліў кіраўнік краіны.

"На нядаўняй сустрэчы ў Астане Прэзідэнт Расіі прапанаваў краінам ЕАЭС удзельнічаць у расійскіх праграмах. Вельмі добрае, правільнае і нацэленае на вынік рашэнне, і трэба актыўна гэтым скарыстацца. Мы намецілі рэалізаваць у 2016-2020 гадах маштабныя навукова-тэхнічныя праекты", - сказаў беларускі лідар. Сярод найважнейшых - стварэнне новай сістэмы спадарожнікавай сувязі, развіццё сістэмы дыстанцыйнага зандзіравання Зямлі, развіццё біятэхналагічнай галіны на аснове дасягненняў тонкай хіміі, генетыкі, тэхналогій стваловых клетак, навуковае суправаджэнне атамнай энергетыкі.