Бізнес-навіны

Ляхновіч: у перспектыве ў "Белавія" больш за дзясятак новых напрамкаў палётаў

Фота з архiва

6 студзеня, Мінск /Кар. БЕЛТА/. Дзякуючы набыццю далёкамагістральных Airbus A330-200 "Белавія" ўпершыню стала лятаць на кітайскі востраў Хайнань, в'етнамскі Фукуок, астраўную дзяржаву Шры-Ланка. На студзень намечаны палёты ў Тайланд. У распрацоўцы на бліжэйшую перспектыву больш за дзясятак новых напрамкаў, сярод якіх Іарданія, Туніс, гарады Кітая. Аб гэтым часопісу "Экономика Беларуси" паведаміў міністр транспарту і камунікацый Аляксей Ляхновіч.

Кампанія "Белавія" выконвае рэгулярныя рэйсы з Нацыянальнага і аэрапортаў Гомель, Брэст, Магілёў у 22 аэрапорты 12 дзяржаў. У 2025 годзе адкрыты чартарныя рэйсы з Мінска ў Салалу (Аман) і Рас-эль-Хайма (ААЭ). Стартавалі першыя рэгулярныя рэйсы з Брэста ў Санкт-Пецярбург і з Магілёва ў Маскву. У снежні аднавілася палётная праграма з Мінска ў Алматы, а ў студзені 2026 года - у Ізраіль.

"У 2025 годзе флот "Белавія" папоўніўся трыма далёкамагістральнымі самалётамі Airbus A330-200. Гэта знакавая падзея не толькі для нашага нацыянальнага авіяперавозчыка, але і для ўсёй грамадзянскай авіяцыі Беларусі. Магчымасці лайнераў дазваляюць без дазапраўкі ажыццяўляць палёты на вялікія адлегласці. Цяпер два борты эксплуатуюцца на дзеючых маршрутах, яшчэ адзін плануюць увесці ў строй у лютым", - удакладніў міністр.

З улікам узрастаючага попыту ў жыхароў краіны на авіяперавозкі і запатрабаванасці новых турыстычных напрамкаў прыярытэтнай задачай на бліжэйшую перспектыву стане далейшае папаўненне флоту. У наступным годзе "Белавія" плануе закупіць яшчэ некалькі паветраных суднаў.

Парк нацыянальнага авіяперавозчыка аснашчаны камфартабельнымі Boing, Embraer і Airbus, якія адпавядаюць усім міжнародным патрабаванням бяспекі.

версія для друку

зрабіць стартавай

дабавіць у выбранае