Бізнес-навіны

Лічбавую платформу для геалагічнай разведкі распрацоўваюць у кампаніі "Беларуснафта"

Фота "Беларуснафты"

27 жніўня, Гомель /Кар. БЕЛТА/. Лічбавую сістэму для геалагічнага блока распрацоўваюць у кампаніі "Беларуснафта", паведамілі БЕЛТА на прадпрыемстве.

Размова аб стварэнні зручнага віртуальнага інструмента для геолагаў прадпрыемства, які дасць магчымасць эфектыўна кіраваць бізнес-працэсамі, аператыўна аналізаваць даныя. Інавацыйны прадукт распрацоўвае каманда ўпраўлення лічбавізацыі. Фундамент інфармацыйна-аналітычнай сістэмы "Лічбавая геолагаразведка" ўжо сфарміраваны. Курыруе працэс стварэння старшы бізнес-аналітык Максім Каваленка. Паводле яго слоў, укараненне "лічбы" ў любую галіну ведаў, навукі, вытворчасці не спыніць.

У аснове "Лічбавай геолагаразведкі" адзінае сховішча даных, якое аб'ядноўвае розныя дакументы і справаздачы па геолага-разведачным профілі. "Важна, каб гэты масіў суправаджаўся механізмам індэксацыі файлаў з паўнатэкставым пошукам і зручным інтэрфэйсам. Сховішчы, як і ўся сістэма, будуць працаваць па прынцыпе адзінага акна. Гэта прадугледжвае максімальна хуткі доступ да патрэбнай інфармацыі для ўсіх удзельнікаў геолага-разведачных работ. Тут жа будзе і аналітыка праектаў, выкананых у папярэднія перыяды", - растлумачыў Максім Каваленка. Падрыхтаваны ўніверсальны АРІ для абмену данымі, што значна спросціць інтэграцыю з любымі знешнімі і ўнутранымі сістэмамі.

Па сутнасці гэта лічбавая платформа дасць магчымасць убачыць нябачнае. "Мадэрнізаваны модуль дае поўную карціну аб контурах розных геалагічных аб'ектаў (пакладаў, горных і геалагічных адводаў), аб праведзеных сейсмічных 3D-здымках, сеткі 2D-профіляў. І ўсё гэта з неабходнай тэкставай інфармацыяй, а таксама з магчымасцю загрузкі ў якасці падложкі структурных карт - важных атрыбутаў геолагаразведкі, на якіх адлюстраваны будова і заляганне горных парод, тэктанічныя разломы і перспектыўныя структуры для бурэння новых свідравін. Патрэбны функцыянал распрацаваны", - адзначылі на прадпрыемстве.

На чарзе - распрацоўка "лічбавага кернасховішча". Збор патрабаванняў і распрацоўку модуля гэтай падсістэмы праграмнага комплексу пачнуць у верасні. Плануецца, што гэты раздзел будзе ўключаць не толькі апісальныя даныя аб кернавым матэрыяле, што захоўваецца ў БелНДПІнафта, але і прадастаўляць вынікі палявых, а таксама лабараторных даследаванняў горных парод і флюідаў.

На перспектыву разглядаецца ідэя спраектаваць таксама "Лічбавую лабараторыю", якая дасць магчымасць кіраваць прыборна-інструментальным паркам Цэнтра апрацоўкі, даследавання і захоўвання керну БелНДПІнафта, забяспечыць доступ да неабходных стандартаў і рэгламентаў.

На думку начальніка ўпраўлення геалогіі і распрацоўкі радовішчаў цэнтральнага апарату "Беларуснафты" Віктара Прывалава, інфармацыйна-аналітычная сістэма сатрэ межы паміж усімі, хто так ці інакш задзейнічаны ў геолага-разведачных работах. "Маментальны доступ да самай актуальнай вытворчай інфармацыі дапаможа хутчэй наладжваць камунікацыю розным профільным спецыялістам і службам, сэканоміць шмат часу. Але самае галоўнае - гэта прэдыктыўная функцыя праграмнага комплексу, дзякуючы якой мы зможам больш рацыянальна падыходзіць да пошукавага свідравання, лепш ацэньваць перспектыўнасць будучых праектаў. Лічбавізацыя геолагаразведкі - крок, якога патрабуе час", -  акцэнтаваў ён, паколькі фонд і нафтасэрвісныя аперацыі ўжо ў "лічбе".

Вытворчае аб'яднанне"Беларуснафта" створана ў 1966 годзе. Прадпрыемства вядзе пошук, разведку і распрацоўку нафтавых радовішчаў, бурэнне свідравін, здабычу нафты і спадарожнага нафтавага газу ў Беларусі, працуе ў нафтавай сферы іншых краін.

версія для друку

зрабіць стартавай

дабавіць у выбранае