Бізнес-навіны

Лазеры, святлодыёды, оптыка для космасу: што распрацоўваюць вучоныя Беларусі і Расіі

26 сакавіка, Мінск /Кар. БЕЛТА/. Беларускія і расійскія вучоныя сумесна распрацоўваюць лазеры, святлодыёды і аптычныя прыборы для космасу. Аб гэтым паведаміў журналістам дырэктар Інстытута фізікі Нацыянальнай акадэміі навук Сяргей Гапоненка, перадае карэспандэнт БЕЛТА.

"Праграмы Саюзнай дзяржавы - гэта найвышэйшая форма навукова-тэхнічнага ўзаемадзеяння Беларусі і Расіі. Наш інстытут рэалізаваў ужо дзве такія праграмы, цяпер выконваем трэцюю - "Кампанент-Ф". Яна прысвечана стварэнню новых кампанентаў для высокатэхналагічнай галіны прамысловасці, якая называецца фатоніка. Гэта ўсё, што звязана са святлом, гэта значыць лазеры, аптычныя прыборы, аптычныя элементы, крыніцы святла альбо прыёмнікі святла. Мы выконваем праграму сумесна з расійскімі арганізацыямі. Больш за 20 распрацовак мы павінны завяршыць у 2026 годзе. Некаторыя з іх пойдуць у серыю, некаторыя будуць унікальнымі, штучнымі і вырабляцца па індывідуальных заказах. Некаторыя распрацоўкі стануць асновай для новых тэхналогій", - сказаў Сяргей Гапоненка. Чакаецца, што ў выніку будуць атрыманы і тэхналогіі, і абсталяванне, і методыка стварэння новых аб'ектаў, напрыклад эфектыўных ультрафіялетавых святлодыёдаў на аснове нітрыду галію.

Супрацоўніцтва з Расіяй актыўна развіваецца. "На мінулым тыдні я ў складзе дэлегацыі Акадэміі навук правёў перагаворы з кіраўніцтвам Санкт-Пецярбургскага навуковага цэнтра Расійскай акадэміі навук. Мы абмяркоўвалі дарожную карту дзвюх акадэмій, асабліва па Санкт-Пецярбургу. У гэтай дарожнай карце пяць нашых новых напрамкаў. Яны звязаны з новымі лазерамі, святлодыёдамі, прыборамі ў галіне плазменных тэхналогій, аптычнай сувязі ў космасе і апрацоўкі аптычных сігналаў", - адзначыў дырэктар інстытута.

Паводле яго слоў, усе распрацоўкі інстытута - экспартна арыентаваныя. "На наступным тыдні мы павязём больш за дзясятак нашых распрацовак на міжнародную выстаўку "Фатоніка" ў Маскве, будзем прапаноўваць іх для рэалізацыі", - дадаў вучоны.

версія для друку

зрабіць стартавай

дабавіць у выбранае