Бізнес-навіны

Кыргызстан зацікаўлены ў стварэнні зборачнай вытворчасці беларускай сельгастэхнікі

29 верасня, Мінск /Кар. БЕЛТА/. Кыргызстан зацікаўлены ў стварэнні зборачнай вытворчасці беларускай сельскагаспадарчай тэхнікі, заявіў старшыня Кабінета Міністраў - кіраўнік Адміністрацыі Прэзідэнта Кыргызскай Рэспублікі Адылбек Касымаліеў на сустрэчы з прэм'ер-міністрам Беларусі Аляксандрам Турчыным, перадае карэспандэнт БЕЛТА.

Адылбек Касымаліеў адзначыў, што ў аснове двухбаковых адносін - агульная памяць аб гераічным мінулым. Гэта трывалы фундамент. Паміж краінамі заключана больш за 50 двухбаковых міжнародных дагавораў. Бакі з'яўляюцца актыўнымі ўдзельнікамі інтэграцыйных аб'яднанняў.

"Бачым ключавую задачу - напоўніць наша ўзаемадзеянне канкрэтнымі эканамічнымі праектамі, - падкрэсліў Адылбек Касымаліеў. - Зацікаўлены ў арганізацыі на базе Кыргызстана зборачных вытворчасцей сельскагаспадарчай тэхнікі".

Дылерам прадукцыі беларускіх вытворцаў выступае "Аўтамаш радыятар". Для абнаўлення машынна-трактарнага парку рэалізуюцца лізінгавыя праграмы з дзяржаўнай падтрымкай, якія даюць магчымасць на льготных умовах набываць тэхніку. "Бачым значны патэнцыял для сумесных праектаў з беларускімі партнёрамі - ад пашырэння прамых паставак да сэрвісных цэнтраў і лакалізацыі", - сказаў Адылбек Касымаліеў.

Таксама Кыргызстан зацікаўлены ў абмене вопытам у сферы жывёлагадоўлі, прамкааперацыі. Адным з прыкладаў супрацоўніцтва Адылбек Касымаліеў назваў узаемадзеянне з "Магілёўліфтмашам" па ўстаноўцы ротарных парковак. У бліжэйшы час плануецца запуск другой такой паркоўкі. Яшчэ адзін значны праект - будаўніцтва ў горадзе Каракол смеццеперапрацоўчага комплексу беларускім прадпрыемствам. Работа па гэтым напрамку прадаўжаецца і ў іншых гарадах Кыргызстана.

Таксама Адылбек Касымаліеў адзначыў паспяховае правядзенне ў рамках міжнароднай выстаўкі "Белагра" ў Мінску беларуска-кыргызскага бізнес-форуму. "Лагічным працягам бачым арганізацыю наступнага бізнес-форуму ў Бішкеку ў наступным годзе", - дадаў ён.

версія для друку

зрабіць стартавай

дабавіць у выбранае