Бізнес-навіны

Кажамяка: жыхары Прымор'я давяраюць якасці беларускай прадукцыі

25 сакавіка, Мінск /Кар. БЕЛТА/. Жыхары Прымор'я давяраюць якасці беларускай прадукцыі. Аб гэтым пасля сустрэчы з Прэзідэнтам Беларусі Аляксандрам Лукашэнкам заявіў журналістам губернатар Прыморскага края Расіі Алег Кажамяка, перадае карэспандэнт БЕЛТА.

"Для нашага насельніцтва вельмі важна атрымліваць якасныя экалагічныя прадукты з Беларусі. І мы бачым, што прыморскія спажыўцы вельмі паважліва ставяцца, давяраюць якасці беларускай прадукцыі і ахвотна яе спажываюць", - падкрэсліў губернатар.

Адказваючы на пытанне, у чым прычына таго, што бакі істотна прыбавілі ў тавараабароце ў пачатку гэтага года, ён сказаў: "Гэта жаданне працаваць, той вопыт, які на працягу многіх гадоў напрацаваны з Беларуссю, нашых гандлёвых, партнёрскіх адносін. І гэта тая прадукцыя, тыя выклікі часу, якія патрабуюць больш інтэнсіўнай работы".

Алег Кажамяка лічыць, што трэба шырэй выкарыстоўваць патэнцыял беларускай тэхнікі па розных напрамках у гаспадарцы Прыморскага края. "Ёсць добрая дынаміка. Мы яе будзем прадаўжаць. І ў пастаўках для ліфтавай гаспадаркі, камунальнай тэхнікі, прадуктаў харчавання... Мы знаходзім узаемавыгаднае супрацоўніцтва", - запэўніў ён.

Бакі рэалізуюць цікавыя праекты і ў сферы сельскай гаспадаркі. Падпісаны пагадненні па насенняводстве, бульбаводстве, развіцці плодаагародніннай гаспадаркі. "Навукова-эксперыментальнага першага саду на 200 га, чаго ў Прымор'і ўжо амаль 30 гадоў не было", - удакладніў Алег Кажамяка.

Але, бадай, адзін з самых маштабных сумесных праектаў чакаецца ў будаўніцтве. Беларускія спецыялісты ўзвядуць пад ключ вялікі культурна-выставачны цэнтр, у якім размесціцца і прыморская сцэна Марыінскага тэатра, выставы вядомых расійскіх музеяў. Губернатар разлічвае, што аб'ект стане сапраўдным упрыгажэннем для ўсяго Азіяцка-Ціхаакіянскага рэгіёна.

Акрамя таго, восенню бягучага года плануецца завяршыць будаўніцтва ва Уладзівастоку гандлёвага дома Беларусі.

версія для друку

зрабіць стартавай

дабавіць у выбранае