Бізнес-навіны

Каробчанка: Татарстан гатовы прапанаваць пляцоўку для вытворчасці і продажу прадукцыі "АМКАДОР"

Фота з архiва

12 красавіка, Мінск /Кар. БЕЛТА/. Татарстан гатовы прапанаваць плацдарм на сваёй тэрыторыі для вытворчасці і продажу прадукцыі "АМКАДОР". Аб гэтым паведаміў віцэ-прэм'ер Татарстана - міністр прамысловасці і гандлю Алег Каробчанка ў праекце "Па факце: рашэнні Першага" на YouTube-канале БЕЛТА.

За час візіту ў Беларусь дэлегацыя з гэтага расійскага рэгіёна наведала шэраг прадпрыемстваў, сярод якіх "АМКАДОР", МТЗ, БЕЛАЗ. "Мы бачым, што людзі заняты, тэхніка вырабляецца, і яна поўнасцю канкурэнтаздольна і Захаду, і Кітаю", - падзяліўся ўражаннямі Алег Каробчанка. Разам з тым ён прызнаў, што ёсць яшчэ шэраг нявырашаных пытанняў, над якімі трэба будзе папрацаваць абодвум бакам. У той жа час ёсць і ўпэўненасць, што рашэнні будуць знойдзены. "Думаю, сустрэчы нашых прадпрыемстваў (прадстаўнікоў прадпрыемстваў. - Заўвага БЕЛТА) павінны прынесці вялікі вынік - і фінансавы, і тэхналагічны, і эканамічны - для нашых дзяржаў", - сказаў ён.

Асобна віцэ-прэм'ер расійскага рэгіёна прыгадаў пра візіт на "АМКАДОР". "Мы хацелі б прапанаваць ім плацдарм у Татарстане, каб яны пашырылі продажы, (арганізавалі. - Заўвага БЕЛТА) свае дыстрыб'ютарскія цэнтры, сэрвісны цэнтр. І, можа, размясцілі сваю вытворчасць у нас на тэрыторыі, - заявіў Алег Каробчанка. - Рынак Расіі вялізны, цяпер многія кампаніі ад нас пайшлі. Таму замясціць іх - першачарговая задача і ў нас, і ў беларускіх вытворцаў. Калі кампанія "АМКАДОР" да нас зойдзе, мы з задавальненнем прадаставім (ім пляцоўку. - Заўвага БЕЛТА) і сумесныя праекты будуць ажыццёўлены".

версія для друку

зрабіць стартавай

дабавіць у выбранае