Бізнес-навіны

Калінкавіцкі малочны камбінат на Armenia Expo заключыў кантракт на $55 тыс.

17 верасня, Мінск /Кар. БЕЛТА/. УП "Калінкавіцкі малочны камбінат" заключыла на міжнароднай выстаўцы Armenia Expo кантракт на $55 тыс. на пастаўку малака сухога абястлушчанага для вытворчасці марожанага. Аб гэтым паведамілі БЕЛТА на выставачным прадпрыемстве "Белінтэрэкспа" Беларускай гандлёва-прамысловай палаты.

Таксама ў прадпрыемства ёсць дамоўленасці аб заключэнні яшчэ кантрактаў на пастаўку прадукцыі для вытворчасці марожанага. "Прадукцыя Калінкавіцкага малочнага камбіната знаёма спажыўцам у краінах СНД, Азіі, Афрыкі і Блізкага Усходу. У Арменіі прадпрыемства прадстаўляе прадукты гандлёвай маркі "Калінка": малако сухое абястлушчанае, малако сухое натуральнае, масла салодкасметанковае, сыроваткау сухая, сыры цвёрдыя і паўцвёрдыя", - дадалі ў "Белінтэрэкспа".

Усяго на выстаўцы прымаюць удзел 11 прадпрыемстваў з Беларусі - яны дэманструюць на экспазіцыі Made in Belarus лепшыя ўзоры і навінкі, адаптаваныя пад густы і патрэбнасці армянскіх спажыўцоў.

Самым маштабным у экспазіцыі стаў стэнд канцэрна "Белдзяржхарчпрам". Тут сваю прадукцыю прадстаўляюць вядомыя беларускія брэнды: кандытарскія фабрыкі "Слодыч" і "Камунарка", Слуцкі цукроварафінадны камбінат, а таксама буйнейшы вытворца алкагольнай прадукцыі ў Беларусі - холдынг "Мінск Крышталь Груп".

Беларускую малочную галіну на Armenia Expo прадстаўляюць Слуцкі сыраробны камбінат, Калінкавіцкі малочны камбінат і Шчучынскі філіял прадпрыемства "Малочны свет". "Слуцкі сыраробны камбінат з'яўляецца адным з буйнейшых малочных прадпрыемстваў Беларусі. Кампанія дэманструе ў Арменіі прадукцыю гандлёвай маркі "Ясь Белоус" - сыры, сухое малако і масла. Гэтыя віды беларускай прадукцыі традыцыйна карыстаюцца попытам на Каўказе - у 2020 годзе яны, разам з вяршкамі і тварагом, пераважалі ў экспарце беларускіх прадуктаў у Арменію", - адзначылі ў выставачнай кампаніі.

Мясную галіну прадстаўляе ААТ "Гродзенскі мясакамбінат". Прадпрыемства прэзентуе хамон і іншую мясную прадукцыю. Штомесяц на Гродзенскім мясакамбінаце вырабляецца больш за 1,2 тыс. т ялавічыны, 3 тыс. т каўбасных вырабаў і вэнджаніны, больш за 500 т паўфабрыкатаў.

У экспазіцыі Made in Belarus прымаюць удзел і вытворцы сельскагаспадарчай тэхнікі. У прыватнасці, холдынг "Гомсельмаш" - адзін з лідараў сусветнага рынку камбайнаў і іншых складаных сельгасмашын. Дзве машыны пад брэндам "Палессе" з 2020 года працуюць ужо на палях Арменіі.
 
Свае магчымасці дэманструе ААТ "Кіруючая кампанія холдынга "Гроднааблсельгастэхніка "- вытворца сельгастэхнікі ў Беларусі. У яго склад уваходзіць 12 прадпрыемстваў, якія вырабляюць глебаапрацоўчую, корманарыхтоўчую, пасляўборачную тэхніку, а таксама даільныя ўстаноўкі. Прадукцыя кампаніі экспартуецца ў Літву, Украіну, Грузію, Расію.

У экспазіцыі прымае ўдзел ААТ "Гомельскі электрамеханічны завод". Прадпрыемства больш за 20 гадоў вырабляе чыгуначныя лакаматывы і рухомыя саставы, а таксама складаную прадукцыю: універсальныя вагонныя запавольнікі, якія неабходны для мадэрнізацыі і рамонту сартавальных горак.

Выстаўка будзе доўжыцца да 18 верасня. Арганізатар экспазіцыі беларускіх прадпрыемстваў Made in Belarus - выставачнае ўнітарнае прадпрыемства "Белінтэрэкспа" Беларускай гандлёва-прамысловай палаты. Мерапрыемства праходзіць пры падтрымцы пасольства Беларусі ў Арменіі.

версія для друку

зрабіць стартавай

дабавіць у выбранае