Бізнес-навіны
Качанава: няпросты ў эканоміцы 2022 год даказаў эфектыўнасць выбудаванай у Беларусі сістэмы ўлады
18 студзеня, Магілёў /Кар. БЕЛТА/. Няпросты ў эканоміцы 2022 год даказаў эфектыўнасць выбудаванай у Беларусі сістэмы ўлады. Аб гэтым заявіла старшыня Савета Рэспублікі Наталля Качанава на сустрэчы са старшынямі абласнога, гарадскіх і раённых Саветаў дэпутатаў, а таксама выканаўчых камітэтаў Магілёўскай вобласці, перадае карэспандэнт БЕЛТА.
"Пачаўся ўжо 2023 год, мы практычна падвялі вынікі 2022 года або яшчэ недзе падводзім, але статыстыка ўжо ёсць. Задачы, якія былі пастаўлены перад урадам нашай краіны, у сацыяльна-эканамічным развіцці, даведзены да кожнай вобласці. Для сябе ўжо кожны ведае і разумее, што зрабілі, дзе недапрацавалі і якія задачы трэба вырашаць у перспектыве, таму што яны дакладна вызначаны VI Усебеларускім народным сходам, тымі дзяржаўнымі праграмамі, якія працуюць у нашай краіне", - адзначыла Наталля Качанава.
Паводле слоў спікера, беларуская эканоміка ў няпростых умовах мінулага года эфектыўна спрацавала. "Мы бачым, што, нягледзячы на санкцыйны націск, на тыя праблемы, якія былі ў плане рэалізацыі прадукцыі нашых прадпрыемстваў, эканоміка спрацавала. Прадпрыемствы працавалі стабільна, заработная плата выплачвалася, - падкрэсліла яна. - Людзі маюць магчымасць працаваць, а прадукцыя наша пастаўляецца на экспарт. У бягучым годзе як ніколі спрацавалі нашы аграрыі, за што ім нізкі паклон, словы ўдзячнасці і падзякі. А значыць, мы забяспечылі сваю харчовую бяспеку і яшчэ на $8 млрд прадалі сельскагаспадарчай прадукцыі на экспарт. Гэта ўсё сведчыць аб тым, што тая сістэма ўлады, тая структура, якая выбудавана ў нашай краіне, - эфектыўная. І складаны 2022 год, які мы з вамі пражылі, мы прайшлі ўсе вельмі дастойна, нягледзячы на ўсе гэтыя перыпетыі, калі многія думалі, што Беларусь рухне, але нічога ў іх не атрымалася".
Вялікі ўклад у забеспячэнне харчовай бяспекі ў 2022 годзе ўнеслі і аграрыі Магілёўскай вобласці. Агульная вага каравая склала больш за 1,3 млн т. Спыняцца ў рэгіёне на гэтым не плануюць: у бягучым годзе плануюць павялічыць ільнопрыдатныя плошчы, узмоцняць увагу да фарміравання кармавой базы для буйной рагатай жывёлы і захавання працоўнай дысцыпліны ў сферы жывёлагадоўлі. Яшчэ адным перспектыўным напрамкам у развіцці сферы АПК стане працяг канструктыўнай работы з фермерамі. Як раней адзначаў старшыня Магілёўскага аблвыканкама Анатоль Ісачанка, у сферы аграпрамысловага комплексу пільную ўвагу будуць удзяляць замацаванню кадраў, забеспячэнню дастойнай заработнай платы і наяўнасці жылля - усё гэта, упэўнены губернатар, дапаможа захаваць кадравы патэнцыял. Ён таксама падкрэсліваў, што кіраўнікам сельскагаспадарчых прадпрыемстваў трэба праяўляць больш самастойнасці, паколькі для паспяховай работы ў вобласці ёсць усё неабходнае, але важна і асабістая зацікаўленасць на месцах.
Такія сустрэчы з актывамі рэгіёнаў Наталля Качанава правяла па ўсёй краіне. Магілёў стаў завяршальнай кропкай. Галоўная мэта такіх мерапрыемстваў - падвесці вынікі мінулага 2022 года, данесці асноўныя пасылы і задачы на бягучы год.
версія для друку
зрабіць стартавай
дабавіць у выбранае