Бізнес-навіны
Ярашэвіч: за 2021 год дадатнае сальда знешняга гандлю дасягнула рэкордных $4 млрд
Фота з архiва
3 лютага, Мінск /Кар. БЕЛТА/. Дасягненні 2021 года стварылі магчымасці для далейшага эканамічнага росту. Аб гэтым заявіў сёння намеснік міністра эканомікі Дзмітрый Ярашэвіч, выступаючы з дакладам на пасяджэнні аб'яднанага клуба дырэктараў "Эканоміка Беларусі ў 2022 годзе і сярэднетэрміновай перспектыве: тэндэнцыі, прыярытэты, выклікі і рызыкі", паведамілі БЕЛТА ў прэс-службе Мінэканомікі.
Як адзначыў Дзмітрый Ярашэвіч, прагназуючы развіццё краіны ў 2022 годзе з улікам існуючых магчымасцей, Мінэканомікі зыходзіла з дасягненняў мінулага года. "Эканоміка вырасла на 2,3 працэнта, з апярэджаннем прагнозу. Не сакрэт, што асноўным драйверам росту стаў знешні попыт, якім бізнес і прадпрыемствы паспяхова скарысталіся. Дадатнае сальда знешняга гандлю дасягнула рэкордных $4 млрд. Гэта трывалы фундамент нашай стабільнасці на макраўзроўні. Мы бачым, што сусветная эканоміка ў цэлым адаптавалася да COVID: растуць вытворчасці, асвойваюцца вызваленыя нішы, перабудоўваюцца лагістычныя ланцужкі. Таму экспарт застанецца найважнейшым пунктам росту і ў 2022 годзе. Мы плануем павялічыць выручку да $53 млрд, прырасці па пастаўках тавараў і паслуг на 6,3 працэнта", - сказаў ён.
Паводле яго слоў, устойлівы доўгатэрміновы эканамічны рост немагчымы без інвестыцый. "Тут два слупы. Па-першае, уласныя сродкі арганізацый. Гэта разумная бізнес-схема - укладваць частку даходу ва ўласнае развіццё, і сёння само жыццё арыентуе прадпрыемства на гэта. Па-другое, мы пераймаем лепшыя сусветныя практыкі для ўдасканалення айчыннага заканадаўства і павышэння тым самым прывабнасці сваёй юрысдыкцыі для ўнутраных і замежных інвестараў. Каб бізнес больш упэўнена планаваў развіццё і смялей рэалізоўваў свае перспектыўныя ініцыятывы, мы скарэкціравалі законы аб інвестыцыях і СЭЗ, а таксама дэкрэт нумар 10. Чаканы вынік нашай інвестыцыйнай палітыкі ў гэтым годзе - рост укладанняў на 3,3 працэнта", - расказаў намеснік міністра эканомікі.
Тлумачачы ў сваім выступленні ўзаемасувязь пытанняў інвесціравання і развіцця прадпрымальніцтва, Дзмітрый Ярашэвіч падкрэсліў, што нязменным прыярытэтам дзяржаўнай палітыкі з'яўляецца падтрымка адказных, добрапрыстойных прадпрымальнікаў і стварэнне для іх камфортнага асяроддзя.
"Для бізнесу ключавым было і застаецца пытанне выдаткаў. Таму мы прадаўжаем работу ў рамках указа Прэзідэнта нумар 240 па зніжэнні адміністрацыйнай нагрузкі праз аптымізацыю колькасці адмінпрацэдур, іх спрашчэнне і перавод у лічбавы фармат. Наяўнасць дакладнага і празрыстага алгарытму аператыўнага выканання працэдур - рэальная эканомія часу і сродкаў для прадпрымальнікаў. Аналагічныя падыходы будуць укаранёны ў новую версію закона аб ліцэнзаванні. Паляпшэнне дзелавога клімату - гэта, разам з экспартнымі стратэгіямі прадпрыемстваў, важны рэзерв для павелічэння даходаў насельніцтва. Мы чакаем, што іх рост у рэальным выражэнні, гэта значыць вышэй за інфляцыю, прадоўжыцца і складзе 2 працэнты. Дынаміка, закладзеная ў праграме-2025, за два гады будзе вытрымана", - канстатаваў намеснік кіраўніка міністэрства.
Рэзюмуючы, Дзмітрый Ярашэвіч нагадаў, што дарожнымі картамі на сярэднетэрміновую перспектыву застаюцца праграма сацыяльна-эканамічнага развіцця і праграма дзейнасці ўрада да 2025 года. У парадку дня - аналіз іх выканання ў 2021 годзе, па выніках якога будуць прыняты меры, якія забяспечваюць безумоўнае дасягненне пастаўленых у дакументах задач.
версія для друку
зрабіць стартавай
дабавіць у выбранае