Бізнес-навіны

Губернатар Курскай вобласці аб супрацоўніцтве з Беларуссю: мы бачым для сябе гэта як акно магчымасцей

9 чэрвеня, Мінск /Кар. БЕЛТА/. Губернатар Курскай вобласці Раман Старавойт бачыць акно магчымасцей у развіцці супрацоўніцтва з Беларуссю. Аб гэтым ён заявіў на сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.

"Мы бачым вялікія перспектывы ў нашым узаемадзеянні. Тавараабарот няхай невялікі, але рост значны. За тры месяцы гэтага года ў 1,8 раза вырас тавараабарот. Гэта ў большай ступені з-за тых абмежаванняў, якія нам аб'явілі недружалюбныя краіны, але мы бачым для сябе гэта як акно магчымасцей. Успрымаем як дадатковы імпульс для сумеснага развіцця", - сказаў кіраўнік расійскага рэгіёна.

Раман Старавойт адзначыў, што разам з ім у Беларусь з Курскай вобласці прыбыла прадстаўнічая дэлегацыя - больш за 40 чалавек. Сярод іх і рэктары ВНУ, кіраўнікі буйнога бізнесу, прадпрымальнікі.

Губернатар расказаў, што напярэдадні дэлегацыя наведвала пляцоўку міжнароднай спецыялізаванай выстаўкі "Белагра-2022", ёсць вялікая цікавасць і да ІТ-сферы.

Раман Старавойт падзякаваў беларускім будаўнікам, якія працуюць на тэрыторыі Курскай вобласці, у тым ліку на атамнай электрастанцыі. У самім Курску актыўна ідзе і будаўніцтва квартала сіламі беларускага забудоўшчыка. "Прыкладна ўжо 80 тыс. кв.м пабудавана. І ў бліжэйшыя некалькі гадоў мы давядзём гэту лічбу да 150 тыс. кв.м. Мы прадастаўляем зямельныя ўчасткі, аказваем садзейнічанне ў падключэнні інжынернай інфраструктуры. У цэлым жыллё для нас - гэта адзін з асноўных напрамкаў, - сказаў губернатар. - Калі гаварыць яшчэ пра будаўніцтва, мы з вашымі калегамі ўжо сёння абмеркавалі выкарыстанне рэсурсу дзяржаўнага праектнага інстытута ў Мінску, каб задзейнічаць у праектаванні аб'ектаў інфраструктуры на тэрыторыі рэгіёна. Вы ўжо выкарыстоўваеце BIM-тэхналогіі (інфармацыйнае мадэляванне будынка. - Заўвага БЕЛТА), яны перспектыўныя. Будоўля Расійскай Федэрацыі перайшла ўжо на BIM. Прыемна, што вашы праекціроўшчыкі таксама працуюць у гэтай частцы".

Акрамя таго, у ходзе візіту дэлегацыі Курскай вобласці абмяркоўваюцца і пытанні сумеснай работы над імпартазамяшчэннем, прадстаўнікі расійскага рэгіёна на чале з губернатарам ужо наведалі шэраг прамысловых прадпрыемстваў у Мінску.

версія для друку

зрабіць стартавай

дабавіць у выбранае