Бізнес-навіны

Галоўчанка: банкаўская сістэма Беларусі гатова крэдытаваць па прымальных стаўках любыя акупныя праекты

Фота з архiва

29 кастрычніка, Мінск /Кар. БЕЛТА/. Банкаўская сістэма Беларусі гатова крэдытаваць па прымальных стаўках любыя акупныя праекты, якія будуць прапанаваны з боку рэальнага сектара эканомікі. Аб гэтым па выніках даклада Прэзідэнту Беларусі заявіў журналістам старшыня праўлення Нацыянальнага банка Раман Галоўчанка, перадае карэспандэнт БЕЛТА.

"Цяпер ліквіднасць у банкаўскай сістэме знаходзіцца на дастаткова добрым узроўні. Рэсурсная база складае больш як Br150 млрд. І банкаўская сістэма гатова крэдытаваць па прымальных стаўках фактычна любыя праекты, зразумела, акупныя, якія будуць прапанаваны з боку рэальнага сектара эканомікі", - заявіў кіраўнік Нацбанка.

Паводле яго слоў, хуткімі тэмпамі расце інвестыцыйнае крэдытаванне. "Гэта таксама не само сабой узялося. Гэта мэтанакіраваная палітыка Нацыянальнага банка па стымуляванні менавіта інвестыцыйнага крэдытавання. За 9 месяцаў інвестыцыйных крэдытаў мы выдалі на Br4,5 млрд. Гэта практычна на 60 працэнтаў больш, чым у мінулым годзе", - адзначыў Раман Галоўчанка.

Ён нагадаў, што напярэдадні Нацбанк увёў спецыяльны нарматыў РВСР (разліковыя велічыні стандартнай рызыкі) менавіта ў адносінах да інвестыцыйнага крэдытавання, каб зрабіць яго яшчэ больш даступным і прывабным. "Каб не абмежаваць апетыты банкаў менавіта па выдачы доўгатэрміновых інвестыцыйных крэдытаў і каб стаўкі па іх былі прымальныя для пазычальнікаў", - растлумачыў кіраўнік Нацбанка.

версія для друку

зрабіць стартавай

дабавіць у выбранае