Бізнес-навіны

Фармацэўтыка і абмен тэхналогіямі. Міністэрства аховы здароўя Беларусі аб пашырэнні ўзаемадзеяння з Кубай

25 чэрвеня, Мінск /Кар. БЕЛТА/. Беларусь і Куба будуць актыўней узаемадзейнічаць у фармацэўтыцы. Аб гэтым паведаміў журналістам міністр аховы здароўя Аляксандр Хаджаеў на палях беларуска-кубінскіх перагавораў на вышэйшым узроўні ў Палацы Незалежнасці, перадае карэспандэнт БЕЛТА.

Кіраўнік ведамства звярнуў увагу, што расце колькасць беларускіх фармацэўтычных прэпаратаў, якія пастаўляюцца на Кубу. "Ужо 52 беларускія прэпараты зарэгістраваны на Кубе, і гэта даволі вялікі прагрэс, - сказаў міністр. - У мінулым годзе мы выйшлі на закупку кубінскіх прэпаратаў, якія таксама сябе добра зарэкамендавалі".

Аляксандр Хаджаеў падкрэсліў, што ёсць вялікі патэнцыял, які патрабуе практычнай рэалізацыі. "Думаю, візіт кубінскай дэлегацыі на вышэйшым узроўні ў гэтай частцы будзе вельмі значным, - сказаў міністр, звярнуўшы ўвагу на высокі ўзровень медыцыны на Кубе. - Тэхналогіі, якія ў іх ёсць, нам вельмі цікавыя. І мы гатовы іх пераймаць. У сувязі з гэтым адзначу ў тым ліку кубінскія анкалагічныя прэпараты, вакцыны".

Ён дадаў, што спектр пастаўляемых на Кубу беларускіх прэпаратаў даволі шырокі, у тым ліку гэта процізапаленчыя прэпараты, антыбіётыкі і інш.

версія для друку

зрабіць стартавай

дабавіць у выбранае