Бізнес-навіны

Дэпазіты, крэдытаванне фізасоб і ЗВР. Кіраўнік Нацбанка адказаў на актуальныя пытанні аб фінансавай сферы

12 жніўня, Мінск /Кар. БЕЛТА/. Задачы, якія пастаўлены перад Нацыянальным банкам і банкаўскай сістэмай, выконваюцца, а сітуацыю ў гэтай сферы можна ахарактарызаваць як добрую. Аб гэтым журналістам заявіў старшыня праўлення Нацыянальнага банка Раман Галоўчанка пасля даклада ў Прэзідэнта Беларусі Аляксандра Лукашэнкі аб развіцці банкаўскай сферы, перадае карэспандэнт БЕЛТА.

Раман Галоўчанка падрабязна праінфармаваў Аляксандра Лукашэнку аб тым, як вырашаюцца задачы, якія былі пастаўлены перад новым складам праўлення Нацыянальнага банка. Сам старшыня праўлення Нацбанка характарызуе сітуацыю ў гэтай сферы як добрую. "Прэзідэнт, напэўна, з гэтай ацэнкай згадзіўся. Задачы, якія пастаўлены перад банкаўскай сістэмай і непасрэдна Нацыянальным банкам, выконваюцца, і таго ёсць добрае пацвярджэнне на ўзроўні лічбаў і фактаў", - сказаў журналістам Раман Галоўчанка.

Старшыня праўлення Нацбанка адзначыў, што атрымаў каштоўную інфармацыю ад кіраўніка дзяржавы па найбольш вострых напрамках міжнароднай палітыкі, у якую Прэзідэнт максімальна паглыблены. "Гэта было для мяне вельмі каштоўна і карысна для арыентавання пры планаванні прыняцця пэўных рашэнняў, - канстатаваў Раман Галоўчанка. - Вядома, фінансы цесна завязаны на палітыцы. І працэсы, якія адбываюцца ў свеце, аказваюць непасрэдны ўплыў на фінансавыя рынкі".

Аб сферы дэпазітаў

Паводле яго слоў, на гэтым этапе забяспечана цэнавая і фінансавая стабільнасць. Насельніцтва дастаткова актыўна праводзіць аперацыі на фінансавым рынку. Рост дэманструе і сфера дэпазітаў. "Радасна, што самы вялікі прырост дэманструецца ў нацыянальнай валюце. Сёння практычна 73 працэнты ўсіх нашых укладаў - гэта ўклады ў беларускіх рублях на тэрмін больш за год. Гэта добрая рэсурсная база для інвесціравання", - падкрэсліў Раман Галоўчанка.

Аб інвестыцыйным крэдытаванні

Нацыянальны банк прымае ўсе неабходныя рашэнні, каб стымуляваць інвестыцыйнае крэдытаванне. Практычна за шэсць месяцаў каля Br3 млрд укладзена ў інвестыцыйныя праекты, якія ствараюць дабаўленую вартасць. "Працэнтная палітыка банкаў, на якую аказвае ўплыў Нацыянальны банк, таксама дае магчымасць ажыццяўляць інвестыцыі на камфортных умовах. Сярэдняя працэнтная стаўка па такіх крэдытах - менш як 10 працэнтаў. Гэта цалкам прымальная, што называецца, цана грошай, каб інвесціраваць і развівацца", - лічыць старшыня праўлення Нацбанка.

Аб крэдытаванні фізічных асоб

Гаворачы пра крэдытаванне фізічных асоб, Раман Галоўчанка адзначыў, што яно не павінна быць бескантрольным: "Каб не расла нагрузка на нашых грамадзян і каб асноўны паток крэдытавання на спажывецкія мэты ішоў на тавары і паслугі айчыннай вытворчасці".

Старшыня Нацбанка звярнуў увагу, што тут таксама ўдалося дасягнуць пэўнага поспеху. За паўгода прырост крэдытавання тавараў беларускай вытворчасці склаў каля 35 працэнтаў.

Аб прыбытку банкаў і золатавалютных рэзервах

"Банкаўская сістэма са сваімі задачамі спраўляецца і зарабляе нядрэнны прыбытак. Разам з Банкам развіцця па выніках паўгоддзя прыбытак банкаў склаў каля Br3 млрд і істотна павялічыўся ў параўнанні з перыядам мінулага года. А прыбытак банкаў - гэта таксама, зразумела, крыніца для нарошчвання ўласнага статутнага капіталу і далейшага інвесціравання ў выгадныя для краіны праекты", - падкрэсліў Раман Галоўчанка.

Сам Нацыянальны банк выконвае свае статутныя задачы, дадаў ён: "Мы зусім нядаўна дасягнулі рэкорднага ўзроўню золатавалютных рэзерваў - больш за $12 млрд".

Аб стаўцы рэфінансавання

Раман Галоўчанка лічыць, што дзеючая стаўка рэфінансавання з'яўляецца актуальнай. "Цяпер мы не бачым прычын да ўзмацнення грашова-крэдытнай палітыкі, у прыватнасці павышэння стаўкі. Можа, будзе паніжэнне. Але Нацыянальны банк уважліва сочыць за сітуацыяй і пры неабходнасці будзе прымаць меры", - запэўніў Раман Галоўчанка.

Паводле слоў старшыні Нацбанка, у эканоміцы цяпер дастаткова грошай: "Грашовая маса здольна задаволіць патрэбнасць эканомікі ў інвестыцыях і, адпаведна, у развіцці. Але мы ўважліва сочым за ўсімі працэсамі, якія адбываюцца. У Нацыянальным банку працуюць вельмі прафесіянальныя спецыялісты, якія валодаюць шырокім наборам інструментаў, каб адэкватна і своечасова рэагаваць на існуючую сітуацыю".

версія для друку

зрабіць стартавай

дабавіць у выбранае