Бізнес-навіны
"Чырвоны мазыранін" пачаў пастаўляць ласункі ў Казахстан
Фота з архiва
22 ліпеня, Нароўля /Кар. БЕЛТА/. "Чырвоны мазыранін" у гэтым годзе пачаў адгрузкі ў Казахстан. Аб гэтым ішла размова сёння на сустрэчы старшыні Гомельскага аблвыканкама Генадзя Салаўя з працоўным калектывам прадпрыемства, перадае карэспандэнт БЕЛТА.
Як растлумачыў вядучы спецыяліст па знешнеэканамічнай дзейнасці Васіль Караваеў, у Казахстан адправілі практычна ўсю лінейку прадукцыі, што выпускаецца на прадпрыемстве: зефір, мармелад, ірыс, пасцілу, цукеркі. "Ужо было чатыры адгрузкі. Партнёры маюць намер павялічваць аб'ёмы", - сказаў ён.
У цэлым жа кандытарская фабрыка пастаўляе на замежныя рынкі да трэці прадукцыі. Ласункі з Нароўлі ведаюць у Расіі, Украіне, ЗША, Азербайджане, Грузіі.
"Чырвоны мазыранін" пастаянна абнаўляе лінейку сваіх тавараў. Цяпер мы па магчымасці адыходзім ад прымянення цукру і выкарыстоўваем у прадукцыі цукровую пудру, якая не растае. Навінкі з гэтым інгрэдыентам ужо выпускаем", - адзначыла начальнік тэхналагічнага аддзела Вольга Сазанчук.
Генадзь Салавей звярнуў увагу: на беларускім рынку ёсць і больш танная аналагічная прадукцыя, аднак нараўлянскія ласункі вызначаюцца якасцю, натуральнасцю, што, безумоўна, цэніць спажывец.
"Прадпрыемства павінна працаваць эфектыўна і далей развівацца. У вас ёсць якасная прадукцыя, якая многім знаёма з дзяцінства. Гэта брэндавая прадукцыя. Важна захаваць традыцыі, якія ёсць на вытворчасці", - сказаў старшыня аблвыканкама. Ён лічыць важным развіваць і сетку фірменнага гандлю.
Генадзь Салавей адзначыў, што ў цэлым вобласць развіваецца стабільна і дынамічна. Разнапланавую падтрымку атрымліваюць рэгіёны, якія пацярпелі ад ЧАЭС, такія як Нараўлянскі, Хойніцкі, Брагінскі. Штогод немалыя фінансы накіроўваюцца ў раёны на развіццё сельскай гаспадаркі, сацыяльную сферу, эканамічную. Вялікія грашовыя сродкі на гэтых тэрыторыях укладваюцца ў сістэмы водазабеспячэння, газазабеспячэння, інфраструктуру.
З'яўляюцца ў раёнах новыя аб'екты, у тым ліку вытворчыя. У якасці прыкладу Генадзь Салавей прывёў ферму саўгас-кабіната "Зара" ў Завайці, якая, хоць і пачала работу не так даўно, паказвае ўжо выдатныя вынікі.
"Адназначна падтрымка па чарнобыльскіх праграмах будзе прадоўжана", - падкрэсліў губернатар.
Гаворачы аб выніках работы Гомельскай вобласці ў гэтым годзе, Генадзь Салавей канстатаваў: па некаторых пазіцыях яны крыху ніжэйшыя за мінулагоднія. "Мы страцілі пэўныя рынкі збыту. На гэта паўплывала эпідэміялагічная сітуацыя за мяжой, звязаная з каранавірусам", - удакладніў ён.
Ішла на сустрэчы размова аб развіцці аховы здароўя ў рэгіёне. Губернатар расказаў аб важных аб'ектах, якія ўжо рэканструявалі і якія маюць намер мадэрнізаваць у бліжэйшы час.
Работнікі кандытарскай фабрыкі змаглі задаць кіраўніку вобласці хвалюючыя іх пытанні. Так, цікавіліся, якія мерапрыемствы яшчэ плануюцца ў адпаведнасці з канцэпцыяй Года малой радзімы. "Гэта, перш за ўсё, навядзенне парадку на зямлі. Ёсць яшчэ кропкі - вёскі, аб'екты, куды трэба будзе накіраваць сілы", - сказаў губернатар. Ён перакананы, што пільную ўвагу трэба ўдзяляць і мясцінам памяці. "Мы стварылі мемарыяльны комплекс на месцы спаленай у гады вайны вёскі Ала. У гэтым маштабным праекце ўдзельнічалі і прадпрыемствы, і арганізацыі, і неабыякавыя людзі. Гэта наша гісторыя, якую трэба зберагчы", - заўважыў старшыня аблвыканкама.
Прагучала і пытанне аб мадэрнізацыі дарогі Мазыр - Нароўля. "Самы кароткі шлях з Мінска ў Кіеў - праз вас. Гэта перспектыўны напрамак. Нюансы прапрацоўваюцца", - адказаў Генадзь Салавей.
"Такія сустрэчы вельмі інфарматыўныя і цікавыя. Мы атрымалі шмат новай інфармацыі аб развіцці і раёна, і вобласці. Гэта будзе карысным і ў рабоце, і ў жыцці", - падзялілася ўражаннямі бухгалтар прадпрыемства Валянціна Казлова.
версія для друку
зрабіць стартавай
дабавіць у выбранае